Los ganadores del XXI Concursu de rock “Alejandro Blancu Escayu” amuesen los sos trabayos

Los ganadores del XXI Concursu de rock “Alejandro Blancu Escayu” amuesen los sos trabayos
14 avientu 11:03 2018 Imprimir

Sultanes de la Galaxa, Drunken Buddha y Colegues, los grupos ganadores del XXI Concursu de rock “Alejandro Blancu Escayu”, vienen acabante d’amosar los sos trabayos.

Los vídeos y grabaciones son la resultancia de los premios del certame: 6.000, 3.500 y 2.000 euros, respectivamente, “una cantidá qu’anguaño s’amontó y partióse ‘n’especie’ para faer estes producciones”, destacó’l conceyal de Cultura, Roberto Sánchez Ramos.

El conceyal de Cultura, Roberto Sánchez Ramos, presentó esti miércoles los vídeos producíos polos ganadores del XXI Concursu de Rock “Alejandro Blancu Escayu”, celebráu’l pasáu San Mateo. El conceyal tuvo acompañáu peles trés bandes, Los Sultanes de la Galaxa, Drunken Buddha y Colegues, primeros, segundos y terceros, respectivamente.

El conceyal estimó “el trabayu del promotor Enrique Patricio” y aseguró qu’esta pasada edición, la 21ª, “foi la de mayor asistencia, con una gran calidá de los participantes y de los grupos invitaos, cola nueche de hip hop como gran referente. Gracies tamién a Luis Salgado, Lara González y Víctor Rodríguez, el xuráu, pola so entrega y calidá”. El responsable municipal de Cultura esplicó qu’esta edición, “al tar entamada pola Fundación Municipal de Cultura nos estatutos nun ta previstu apurrir los premios en metálicu. Anguaño amontóse l’importe de los premios, esta vegada n’especie. Asina, el primer premiu ye de 6.000 euros que van destinaos a la grabación, amiestu y masterización del discu amás de la edición de 500 copies y distribución dixital, amás d’un videoclip; el segundu premiu ye de 3.500 euros y l’importe foi destináu a la mesma producción y el terceru, 2.000 euros, foi para la grabación d’un videoclip de Colegues”.

Gustavo González, en nome de los primeres clasificaos, Los Sultanes de la Galaxa –la banda asistió a la rueda de prensa afatiada como nel escenariu-, indicó que “el Concursu ye un sofitu a producir Cultura, a faer coses orixinales. Vinimos d’otru planeta y, nel certame saltó la chispa. Empresta qu’haya variedá”. A manera de conclusión Sánchez Ramos aseguró-yos: “Paristis daqué importante pa la xente. Nun pidáis perdón polo que dicís nel escenariu, pa eso ta la llibertá d’espresión, daqué que ye sagrao”.

  Categories: