Los estudiantes movilícense poles diferencies de temariu pala EBAU ente autonomíes

Los estudiantes movilícense poles diferencies de temariu pala EBAU ente autonomíes
09 abril 10:32 2018 Imprimir

Los estudiantes asturianos de Segundu de Bachilleratu empezaron a movilizase de forma activa pol agraviu comparativu» colos alumnos d’otres comunidaes autónomes en relación col temariu de l’actual prueba d’accesu a la Universidá. 

El caballu de batalla de los estudiantes asturianos ye’l temariu pal exame d’Hestoria d’España, muncho más estensu na rexón que n’otres autonomíes. N’Asturies los estándares d’aprendizaxe nesta materia tomen dende la prehistoria, colos primeres pobladores de la península ibérica hasta la democracia que llega hasta los nuesos díes. Un temariu tan ampliu que los mesmos catedráticos consideren que ye imposible de dar con solu trés hores selmanales de clase. Al comparase por casu con Cantabria, los estudiantes asturianos ponen de relieve que na comunidá vecina solo considérense como «prioritarios» 27 de los 97 estándares que son obligatorios n’Asturies, «lo que facilita descomanadamente -aducen- el llabor de los estudiantes cántabros a la de preparar la prueba, qu’amás tienen cuatro hores selmanales d’esta materia».

Los estudiantes asturianos tamién aprecien desigualdaes col temariu de Llingua Castellana pa la EBAU. Espliquen qu’equí-yos cai analís morfolóxicu y sintácticu, comentariu morfosintácticu, resume de testu, comentariu de testu, poesía y hestoria de la lliteratura, etc. Sicasí los alumnos de Canaries solo tienen que faer el comentariu de testu.

Nun acaba ende la cosa. En cada comunidá autónoma varia’l formatu del exame d’accesu y tamién la manera nel que s’empobina a los alumnos pa realizar esti exame.

Alumnos que se sienten agraviaos n’Asturies, como los Centru d’Enseñanza Secundaria San Eutiquio-La Salle de Xixón, empezaron a recoyer firmes al traviés de la plataforma d’internet ‘change.org’ pa pidir l’amenorgamientu del temariu d’Hestoria d’España d’acordies con otres autonomíes españoles.

Amás, el Sindicatu d’Estudiantes d’Asturies convocó pa esti martes, a les 17.30 hores, una xunta na see del Conseyu de Mocedá de Xixón (avenida de Manuel Llaneza, 68). Lucía Fernández, representante d’esti sindicatu, asegura que la convocatoria ta abierta a los alumnos de Segundu de Bachilleratu de toa Asturies descontentos cola estensión del temariu d’Hestoria publicada nel BOE y partidarios d’adoptar posibles midíes de presión pa consiguir el so amenorgamientu como les que surtieron efectu apocayá en Castiella y Llión.

  Categories: