Los escritores d’Asturies entreguen sos premios el vienres 15

L’Asociación d’Escritores d’Asturies va facer entrega del XV Premiu de les Lletres d’Asturies y los X Premios de la Crítica d’Asturies esti próximu día 15 de xineru a les 19,30 hores na Aula Magna de la Universidá d’Uviéu.
Estos premios fuéronse consolidando añu tres d’añu como unu de los principales eventos de la vida lliterario y cultural de la nuesa comunidá. Nel actu van tar presentes los y les autores premiaos, socios de l’Asociación, amás del Conseyeru de Cultura y otres autoridaes del mundu de la cultura, xuráu de los premios, y persones relevantes del mundu lliterariu.

Los xuraos de los seis premios que concede cada añu l’Asociación d’Escritores d’Asturies aconceyaron nos caberos días del añu pasáu y entamaron por otorgar el primeru los premios a la poeta praviana Olvido García Valdés, pola so trayectoria lliteraria. Olvido foi escoyida por mayoría de votos de los socios y socies de l’Asociación d’Escritores d’Asturies.

El Premiu de les Lletres d’esta Asociación foi a parar a Olvido García Valdés porque “la escritura d’esta poeta ye resultáu d’un trabayu siguíu, onde nun tien cabida la impostura o imperativos estéticos ocasionales. Ye una poesía reflexiva qu’alluma y abre espacios ensin llendes. Averase a la poesía de Olvido García Valdés ye enfusase nun mundu de percepciones qu’arriquez los sentíos y la lliteratura mesma”.

Olvido García Valdés desenvolvió a lo llargo de la so trayectoria un ampliu llabor críticu sobre poesía y sobre arte y recibe’l premiu “pola calidá de la so obra reconocida como una de les voces más prestixoses y sólides de la poesía española actual”.

Los Premios de Poesía

El xuráu formáu por Leopoldo Sánchez Torre, Roberto González-Quevedo y José Luis Argüelles Argüelles, actuando Esther García López como secretaria -con voz y ensin votu, en representación de l’Asociación d’Escritores d’Asturies-, optó por conceder por unanimidá’l XV Premiu de la Crítica d’Asturies, na modalidá de poesía en castellán a “La víspera”, de Rodrigo Olay, y na modalidá de poesía n’asturianu a “Magaya”, d’Alejandro Fernández-Osorio.

El xuráu d’esti premiu destacó la variedá de rexistros de “La víspera” (La Isla de Siltolá), un poemariu nel que Rodrigo Olay (Noreña, 1989), que yá llogró esti mesmu premiu na edición de 2012, aúna tradición y vivencia personal, vida y cultura, meditación y celebración, por aciu una voz de gran sentíu rítmicu na que conflúin distintes llínees de la poesía española y universal de tolos tiempos.

El xuráu destacó, coles mesmes, la novedá espresiva qu’apurre “Magaya”  a la nueva poesía asturiana. El so autor, Alejandro Fernández-Osorio (Villayana, 1984), propón nesti llibru de calter unitariu un regresu a los raigaños personales y familiares pa trazar, dacuando dende la ironía, una potente metáfora del país al empar que tesciende l’anécdota costumbrista.

El Premiu de Narrativa de la AEA

Constituyíu el Xuráu del premiu de Narrativa por doña Conchita Quirós Suárez, don José Ramón Iglesias Cueva y don José Luis Remis García, y actuando como secretariu – ensin voz nin voto – don Ángel García Prieto decidíen por unanimidá conceder el premiu, de la modalidá de narrativa n’asturianu a Don Roberto González Quevedo, pol so llibru “Hestoria de la l.lliteratura primer en Pesicia”, (Ed. Trabe), nel que creó una lliteratura mítico y desconocío pa toos, la de l’antigua Pesicia. Obra escrita nun estilu afechu, llimpiu y claro de la variante occidental del asturianu.

Y el de la modalidá de narrativa en castellán a Doña Carmen Cabeza pol so llibru Raquel so l’agua y otros relatos (Ed.Csed), pola frescura y espontaneidá qu’amuesa, n’estilos narrativos distintos, al enfrentase a los problemes, sentimientos y contradicciones del mundu actual.

Pa finar, el xuráu del Premiu de la Crítica a la columna periodística o lliteraria compuestu por Pilar Rubiera, Adolfo Camilo Díaz y Luis Arias Arguelles Meres, actuando Lauren García como secretariu, concediera el galardón a Manolo Abad pola so estensa ya intensa trayectoria como columnista, afondó en distintes temátiques d’interés (musicales, deportives, culturales…) “nes que, dende la más absoluta independencia, combina analís críticu ya información y un reconocible y reivindicable espíritu lúdicu nel que cualquier manifestación de la cultura popular (del cine negru al cómic, pasando pol rock, la moda o les iconografíes televisives…) tien el so sitiu”