Los escolinos d’asturianu protagonistes esti sábadu na TPA

El Colexu La Canal de Lluancu va ser el protagonista d’esti sábadu 14 d’abril del programa “Nós” qu’emite a les 12,30 la TPA. Los escolinos son los encargaos de dir desplicando la cadama del Colexu y les actividaes que nelli desendolquen, nun modelu que tolos meses dirá repitiéndose visitando colexos en Ayer, Mieres, Carreño o Xixón, por mentar los primeros que dirán visitándose.

El programa que s’emite esti sábadu a les 12,30 hores cunta cola participación de los neños que deprenden asturianu nel Colexu La Canal, ún de los que tien n’Asturies a la práutica totalidá de los escolinos estudiando voluntariamente la llingua de nueso.

El pasáu sábadu 7 d’abril la programación en llingua asturiana tornó a meyorar la audiencia de la TPA en castellán, hasta’l puntu de duplicar el meyor resultáu d’audiencia del día (l’informativu de la nueche col 9,8 por cietu) na emisión de Camín de Cantares qu’algamó picos del 25 % de l’audiencia. La emisión en llingua asturiana, colos programes “Pieces”, “Nós” y “Camín de cantares”, ta sorprendiendo y dexando a les clares que los conteníos d’interés palos asturianos son los que tienen de ver cola so cultura y la so llingua, por muncho que les producciones en llingua asturiana tengan munchísima menor inversión y por tantu medios téunicos y profesionales que la programación en castellán.

Con una audiencia que llegó a superar el 10 por cientu y tuvo penrriba de los programes más vistos que s’emitieron en castellán nel primer sábadu d’emisión, el 31 de marzu, y penrriba de la media de los que s’emiten a lo llargo la selmana, la segunda entrega de los programes que ta acabante d’entamar a emitir la TPA nun pudo tener meyores resultaos.