Los emigrantes mozos en Madrid y Bruseles convoquen un concursu de fotografía

24 mayu 02:37 2006 Imprimir

Les asociaciones d’Asturianos en Bruseles y Madrid conviden a tolos retratistes interesaos, mesmo profesionales qu’aficionaos, a participar nel I Concursu Fotográficu ASBRU-ASMA, col envís d’afalar la creación fotográfica n’Asturies y sobre Asturies. El plazu tope pa la presentación de los trabayos acaba’l miercoles 31 de mayu.

El concursu, que quier establecese con calter biañal, cunta con un xuráu presidíu pol periodista Jose Luis Balbín, director del selmanariu informativu La Clave, y compuestu por profesionales de reconocíu prestixu como Gael Turine, fotógrafu belga autor de varios llibros de fotografía, Luis Hevia, fotógrafu asturianu especialista n’interiorismu y retoque dixital, y Manuel Romarís, delegáu de l’Asociación de Periodistes Gráficos Europeos (APGE). Javier Menendez Bonilla, en representación de les asociaciones ASBRU y ASMA, completa esti xuráu.

El I Concursu Fotográficu ASBRU-ASMA convócase en dos modalidaes : la primera, abierta a tolos fotógrafos asturianos o residentes n’Asturies con tema llibre, y la segunda, abierta a tol mundu col tema «Asturies». Toles obres presentaes van ser amosaes nel portal web d’ASMA (www.asturianosenmadrid.com), onde tamien se puen lleer les bases completes d’esti concursu.

ASBRU, qu’ograniza esta actividá gracies al apoyu del Principáu d’Asturies, ALSA y Air Nostrum, ta preparándose pa celebrar el prósimu 16 de xunu’l so primer aniversariu con una fista en Bruseles. Inspirada nel exitosu modelu desarrolláu por ASMA dende l’añu 2001, ASBRU cunta yá con más de doscientos socios na capital belga.

  Categories:
Loading Facebook Comments ...