Los dos candidatos a Rector comprométense col CUPA a acciones concretes pol asturianu

El Conceyu Universitariu pol Asturianu (CUPA) anunció esta fin de selmana l’alcuerdu al que llegaron colos dos candidatos a ocupar la Rectoría de la Universidá d’Uviéu, Vicente Gotor y Paz Andrés, nel que se comprometen a cuestiones concretes y con unos plazos yá marcados, unos puntos que’l CUPA albidra “esenciales y entá pendientes”. Estos puntos espéyense nel Alcuerdu Programáticu pa la Política Llingüística na Universidá d’Uviéu (2012-2016), que pal CUPA garantiza que nos próximos años sigan dándose pasos pola normalización del asturianu na Universidá d’Uviéu, “seya quien seya’l candidatu que resulte escoyíu nes elecciones al Rectoráu del xueves que vien, 15 de marzu”.

L’alcuerdu inclúi 5 puntos que’l CUPA considera esenciales pal futuru del asturianu na Universidá d’Uviéu: en 6 meses aprobar un reglamentu de rotulación pa la Universidá d’Uviéu nel que se recueya la rotulación billingüe (asturianu/castellán) de tolos cartelos que seyan renovaos y reclamar con firmeza énte’l Gobiernu d’Asturies y el Gobiernu d’España’l reconocimientu de les categoríes profesionales de los maestros y profesores d’asturianu.

Amás nel plazu d’un añu, reforzar les competencies de la Comisión de Normalización Llingüística de la Universidá d’Uviéu, encargándo-y la redacción d’un Plan de Normalización Llingüística pal periodu del mandatu rectoral, coles midíes que se consideren necesaries pa completar el procesu de normalización del idioma asturianu na institución. Nel plazu d’un añu y mediu, diseñar y oficializar un logotipu billingüe (asturianuy/castellán) de la Universidá d’Uviéu / Universidad de Oviedo, nel que dambos nomes apaezan siempres y ensin diferencies gráfiques ente les dos llingües.

Amás los candidatos comprométense a siguir impulsando la presencia del asturianu nes cuestiones yá llevaes alantre nel mandatu anterior, con especial esfuerciu na puesta en valor de la investigación realizada n’asturianu, creando un repositoriu nel que s’axunten trabayos, tesis, etc. redactaos nesta llingua.

El CUPA celebra’l consensu xeneráu alredor de les polítiques llingüístiques na Universidá d’Uviéu, dempués de los pasos daos alantre nestos años, anque recuerda qu’entá queden munches coses por facer pa garantizar la igualdá de dambes llingües na institución.

Amás el CUPA felicitó a los candidatos por usar l’asturianu a lo llargo la campaña, anque fuera de forma llimitada y anímalos a facer medrar esi usu.

Alcuerdu Programáticu pa la Política Llingüística na Universidá d’Uviéu (2012-2016)