Los deberes y la so relación col rendimientu escolar, a alderique nel CMAE

Los deberes y la so relación col rendimientu escolar, a alderique nel CMAE
14 marzu 19:07 2016 Imprimir

Dientro del procesu de trabayu de la Conceyalía d’Educación d’Avilés coles AMPAS, esti martes 15, a les 18 hores, va haber una mesa redonda “Deberes escolares y rendimientu académicu n’estudiantes d’educación obligatoria”. La conceyala d’Educación, Yolanda Alonso, va actuar de moderadora. 

El Centru Municipal d’Arte y Esposiciones (CMAE), allugáu nel númberu 49 de la cai Llanu Ponte, acueye esti martes, 15 de marzu (18:00 hores), la mesa redonda “Deberes escolares y rendimientu académicu n’estudiantes d’educación obligatoria”. L’actividá ta abierta al públicu y va cuntar con serviciu de ludoteca.

La concejala d’Educación, Yolanda Alonso, va actuar de moderadora nun coloquiu que va cuntar colos siguientes participantes: Natalia Suárez Fernández. Doctora en Psicoloxía de la Universidá d’Uviéu. Autora de la tesis doctoral que da títulu a la xornada.Leonardo García González. Xefe d’Estudios CEIP Marcos del Torniello. Tatiana Cuartes Álvarez. AMPA CEIP El Quirinal, en representación del conxuntu de AMPAs d’Avilés. Helena Menéndez Fernández. Alumna 2º Bachilleratu IES Menéndez Pidal y Antena Informativa. Paula Martínez Meré. Alumna de 1º Bachilleratu IES Menéndez Pidal y Antena Informativa.

Esta mesa redonda foi entamada pola Conceyalía d’Educación coles mires de sirvir como puntu d’alcuentru y alderica sobre unu de los aspeutos que más conflictos xenera nel ámbitu educativu: la relación ente rendimientu escolar y la carga de deberes, qu’apocayá vien amenando opiniones engarraes.

Coles mires de refundiar lluz sobre esti asuntu, el puntu de partida d’esti alcuentru van ser les resultancies del trabayu d’investigación que Natalia Suárez Fernández, doctora en Psicoloxía de la Universidá d’Uviéu, afiguró na so tesis doctoral, presentada en 2015. Darréu, va empezar un coloquiu nel que se va dar cabida a les opiniones de toles partes que componen la comunidá educativa: profesoráu, alumnáu y families.

Esti alcuentru forma parte d’un procesu de trabayu, empecipiáu esti cursu escolar pola Conceyalía d’Educación, por aciu el cual pretende establecese una relación directa coles AMPAS de tolos centros educativos d’Avilés, tanto públicos como alcordaos.

  Categories: