Portada Música Los Conciertos del Auditoriu de primavera van ser del 10 d’abril al 25 de xunu

Los Conciertos del Auditoriu de primavera van ser del 10 d’abril al 25 de xunu

by redacción asturnews

Uviéu va acoyer, del 10 d’abril al 25 de xunu, el Ciclu de Primavera de los Conciertos del Auditoriu y les Xornaes de Pianu Luis Iberni, con una programación que va incluyir a la Orquesta Barroca de Venecia y la “Novena Sinfonía” de Beethoven interpretada per Uviéu Filarmonía”.

El presidente de la Fundación Municipal de Cultura, el conceyal José Luis Costillas presentó esti xueves nel Auditoriu’l Ciclu de Primavera de los Conciertos del Auditoriu y les Xornaes de Pianu Luis Iberni. acompañáu del director y coordinador del mesmu, Cosme Marina; la presidenta de la Fundación  Musical Ciudá d’Uviéu, Pilar Rubiera; la subdireutora xeneral del diariu La Nueva España, Ánxeles Rivero y el responsable de la Fundación Edp n’Asturies, Ángel Moraleda.

“Güei anunciamos una reformulación del programa inicial tal que taba plantegáu, por cuenta de la pandemia y les restricciones impuestes, especialmente les derivaes de la movilidá, que ta afectando a les representaciones de les grandes agrupaciones internacionales, quien tuvieron qu’acutar los sos movimientos. Esto traduzse en que les xires de conciertos d’orquestes de gran formatu quedaron prácticamente anulaes en tol mundu, y esto tamién afectó, irremediablemente, a la programación prevista n’Uviéu”, informó Costillas.

La temporada cultural de la música clásica prevista pa esta primavera, esplicó’l responsable municipal de Cultura, “sofitase nun trabayu conxuntu coles ciudaes coles que davezu Uviéu allinia la so programación, como son Madrid, Barcelona, Valencia, San Sebastián o Zaragoza, ente otres, coles que se trabayó de manera estrecha pa ufiertar al públicu alternatives calidable énte los cambeos motivaos pola pandemia mundial.  Siempres lo tamos aprofiando dende la Fundación Municipal de Cultura. Uviéu foi un exemplu a nivel nacional nel enfotu por caltener la programación cultural a pesar de les torgues qu’el COVID foinos poniendo nel camín”. Previsiblemente tolos conciertos van ser a les 19 hores.

Estos dos ciclos, añedió’l conceyal, “son los únicos permanentes qu’esisten n’Asturies qu’ufierten música clásica, que busquen siempres la excelencia y atraer a Uviéu a los meyores intérpretes y agrupaciones internacionales. Poro, el primer oxetivu ye’l de caltener la calidá y, al empar, recuperar proyectos que les restricciones sanitaries obligara a atayar nos meses pasaos. Recuperamos dos conciertos qu’hubo qu’atayar la pasada seronda: el de la Orquesta Barroca de Venecia y el de la “Novena Sinfonía” de Beethoven interpretada per Uviéu Filarmonía”.

El ciclu va desenvolvese ente’l 10 d’abril y el 25 de xunu, “con entraes yá a la vienta (www.entradas.oviedo.es y en taquilla de Campoamor) lo que siempres garantiza, como repitimos hasta l’enfastiu, que la Cultura ye segura y que los teatros son de los espacios públicos más seguros colos que cuntamos nestos tiempos que nos tocó vivir”.

Axúntase’l programa.

Tamién te podria gustar