Los conceyos asturianos sofiten la manifestación pola oficialidá del 21 d’abril

Los conceyos asturianos tán aprobando estos caberos díes mociones favoratibles a la manifestación pola oficialidá que tien convocada la Xunta pola Defensa de la Llingua Asturiana pal día 21 d’abril.

Los Plenos de L.lena, Noreña y Carreño yá mostraron l’apoyu a la convocatoria del 21 d’abril de la Xunta pola Defensa de la Llingua Asturiana y el sindicatu CC. OO., col so secretariu xeneral a la cabeza, apoyó publicamente la marcha la selmana pasada.

El 21 d’abril que vien, les cais d’Uviéu van ser testigos d’una manifestación masiva a favor de la oficialidá de la llingua asturiana y del gallego-asturianu qu’entama la Xunta pola Defensa de la Llingua Asturiana. Mentanto, la convocatoria, que va salir a les 12 hores de la Estación del Norte d’Uviéu, va sumando apoyos nuevos cada día. De momentu, la manifestación yá cuenta col apoyu públicu de los sindicatos USO y CC. OO., que se difundió peles redes sociales con una semeya de los sos líderes teniendo pelos carteles de la convocatoria. Nos díes vinientes van dir dándose a conocer pel mesmu mediu los apoyos d’otros sindicatos asturianos. Amás, los plenos de los Conceyos de Noreña, L.lena y Carreño aprobaron mociones d’apoyu a la manifestación y cúntase con que más conceyos que celebren plenu díes enantes de la marcha saquen alantre midíes asemeyaes.

Eses mociones súmense a les mociones a favor de la oficialidá que yá s’aprobaron nestos meses en conceyos que representen el 75 % de la población d’Asturies: Mieres, Xixón, Uviéu, Avilés, Noreña, Ḷḷena, Castrillón, Llaviana, Villaviciosa, Grau y Corvera.

Otra manera, la Xunta pola Defensa de la Llingua va siguir entamando reuniones con asociaciones y entidaes pa poder axuntar al mayor númberu de sectores sociales a la manifestación pola oficialidá. Amás, van ponese en marcha campañes de difusión, la presentación de cantares pa promocionar la convocatoria y una importante campaña publicitaria na radio y n’autobuses urbanos.