Los Centros Sociales d’Uviéu ufierten actividaes infantiles n’Antroxu

by redacción asturnews | febrero 2, 2018 10:19 am

Los centros sociales uvienos d’Argañosa, San Esteban, Pumarín, San Cloyo, Trubia y Ventanielles ufierten talleres para los menores los próximos 12 y 13 de febreru coincidiendo con díes non lectivos.

Los Centros Sociales programen, per primer vegada, actividaes infantiles los próximos 12 y 13 de febreru, coincidiendo col Antroxu, pa facilitar la conciliación familiar en díes non lectivos. La conceyalía d’Atención a les Persones ya Igualdá, que dirixe Marisa Ponga, quier promover, amás, que les dependencies municipales convertise en centros intergeneracionales, con una ufierta formativa y d’ociu pa toles edaes. La conceyalía d’Atención a les Persones ya Igualdá, que dirixe Marisa Ponga, apueste por una programación interxeneracional nestos servicios municipales.

Seis centros, trés en zona urbana y otros tantos na área rural: Argañosa, San Esteban, Pumarín, San Cloyo, Trubia y Ventanielles van ufiertar talleres d’amarutes, cocina y baille, xuegos, fiestes y chicolataes. Les families que deseyen participar nesta iniciativa tienen d’inscribise primeramente nel centru social, dende yá mesmo n’Argañosa y Pumarín, y a partir del 5 de febreru nel restu.

Con esta nueva ufierta amplíase esti serviciu de sofitu a la conciliación familiar, que yá se punxo en marcha pel branu y en navidá. “Este ye un pasu más para siguir avanzando n’una ufierta d’ociu y coles mesmes dar respuesta a les necesidaes de les families”, afirma la conceyala Marisa Ponga. Los horarios de les actividaes varíen en función de los centros sociales, con ufierta de 9 a 14 hores en dellos casos, y con talleres pela tarde, de 17 a 19 hores, n’otros.

Source URL: http://asturnews.com/los-centros-sociales-duvieu-ufierten-actividaes-infantiles-nantroxu/