Los Centros Culturales d’Avilés programen 55 actividaes gratuites hasta final d’añu

Los Centros Culturales d’Avilés programen 55 actividaes gratuites hasta final d’añu
05 ochobre 11:30 2021 Imprimir

Tornen a Avilés el teatru y el cine familiar, la XV Amuesa de Teatru Amateur, cuentacuentos, bebecuentos, los talleres infantiles d’animación a la llectura y “Pa que nun t’aburras”, nun programa de 55 actividaes gratuites hasta final d’añu. Esti cursu son novedá los conciertos familiares al traviés del programa de la Conseyería de Cultura “Asturies, Cultura en Rede”.

La conceyalía de Cultura d’Avilés refuerza la programación nos centros culturales municipales de Versalles, La Lluz y La Carriona, amás de la Biblioteca Bárganos Candamo, con 55 actividaes totalmente gratuites, que se van desenvolver ente ochobre y avientu.

Con un especial curiáu nes propuestes destinaes a la infancia y a les families, tornen dende la selmana que vienen el teatru y el cine nos barrios, amás de los habituales cuentacuentos, bebecuentos, tallar infantiles de iniciación a la llectura, y los talleres del programa “Pa que nun t’aburres”, nesti casu, al traviés de la Estaya de la Llingua d’Avilés. Amás, y como novedá, va haber conciertos familiares dientro del programa “Asturies en Rede”, promovido pola Conseyería de Cultura.

Y nun podía faltar el tramu final de la XV Amuesa de Teatru Amateur, na qu’entá falten cinco funciones por llevantar el telón, amás de la Gala Fin d’Amuesa, nel Centru Cultural de Los Canapés hasta avientu.

En tolos casos, colos aforos llindaos, y garantizando les condiciones de seguridá sanitaria frente a la pandemia.

Ver programación d’actividaes

  Categories: