Los centros asturianos de Sudamérica busquen dende Arxentina más implicación de la mocedá

Implicar a la mocedá na actividá diaria de los centros asturianos. Con esi envís prioritariu cellebraráse en xineru na llocalidá arxentina de Mendoza, el oeste’l país, el Primer alcuentru de mocedá del Conu Sur, un eventu que tendrá periodicidá biañal y nel que van participar un total de cincuenta mozos d’Asturies y Sudamérica.

Na presentación de la iniciativa, que se dio a conocer esti mediudía n’Uviéu y cuenta col auspiciu de l’Axencia Asturiana d’Emigración, el director d’esti organismu, Luis Miguel Fernández Romero, recordó que l’alcuentru respuende a lo previsto nel Plan Integral d’Emigración del Principáu, y felicitóse d’un cónclave hasta agora inéditu que se prollongará ente’l 20 y el 24 de xineru prósimu.

El programa del eventu afita pa les dos primeres xornaes un análisis del estáu de salú de l’asturianía nes estremaes comunidaes d’emigrantes en Sudamérica, intercambiu de folclore y espectáculos, mientres que’l domingu 23 resérvase como xornada turística pa los participantes y el día’l retornu, 24 de xineru, incluyirá la evaluación del alcuentru, que contará con una web propia y buscará la mayor difusión posible na prensa llocal.

A la presentación de la iniciativa asistieron asinamesmo Leonardo Quercetti, representante del Centru Asturianu de Mendoza, y María Alonso, vicepresidenta del Conseyu de la Mocedá del Principáu, quien saludó l’alcuentru de xóvenes como una ferramienta pa sofitar el vínculu ente los asturianos del Principáu y los que residen nel esterior.

Col alcuentru de xóvenes del Conu Sur, nel que tomarán parte mozos d’ente 15 y 30 años d’edá, el departamentu d’Emigración del Principáu afita’l so interés poles comunidaes asturianes emigraes a América del Sur, que’l presidente Vicente Álvarez Areces y el conseyeru de Relaciones Esteriores, Francisco Javier García Valledor, visitaron n’ochobre pasáu.