Los Celtes del Sol afayense na calurosa Grande Parade de Lorient 2018

Los Celtes del Sol afayense na calurosa Grande Parade de Lorient 2018
05 agostu 19:15 2018 Imprimir

Como tolos años, y ensin que les peraltes temperatures torgaren un res el programa, la delegación asturiana, que como Galicia recibe’l nomatu de celtes del sur o del Sol ente los bretones, brilló otra vuelta peles cais de la ciudá bretona qu’enllenáronse del espíritu y l’entusiasmu popular.

L’ensame cimeru del Festival de Lorient, ente la siella plegable o taburete sol brazu, axuntábase sobremanera na llarga recta al entamu del desfile, al llau del Puertu de Pesca de Lorient, na que France 3 asitia toles sos cámares y l’estraordinariu esplegue. La televisión rexonal francesa retresmitía’l desfile, en diferíu con dos hores de programación ente les 5 y les 7 de la tarde. El Port de Peche, onde nos caberos años finaba’l desfile en llugar del Estadiu de Moustoir, lleva tres años siendo’l llugar onde entamen a desfilar les bandes enantes d’andar los dos kilómetros que separen los dos puntos de la villa. Y l’Estadiu tornó a ser el puntu final d’esti percorríu de cuatro hores completes de coloríu y maxestuosidá de la tradición musical y folklórica de los países del Arcu Atlánticu.

Esti añu les altes teperatures ficieren tener procuru a la organización y notose na media hora que tardara namái en facer el recorríu la Bagad de Lann Bihoue de la que tan arguyosa ta la villa de Lorient, al entamu del desfile. Pero sigún diba pasando’l tiempu, el desfile algamó la so velocidá de siempres y cumpio con toles espectatives del numberosu públicu qu’enllenó les cais de Lorient y l’estadiu Moustoir.

Nunca la rue de la Ferriere, el corazón palpitante del puertu pesqueru de Lorient, ye tan allegáu nun domingu pela mañana como esti primeru d’agostu. Parte de la delegación asturiana salió nos primeros puestos de les 73 agrupaciones que componíen esti añu’l desfile, Abrió’l mesmu cola bandera ástur y nel puestu 18 la Banda de Gaites El Gumial que cola harmonía a la que nos tien avezaos ufrió un perguapu programa a los lorienteses.

El Grupu de Baille San Félix de Candás salió na metá del Desfile (nel puestu 32)  y tuvo que caminar yá pente’l sol del meudía, pero recibió los acaloraos aplausos d’un públicu, el bretón, qu’aprecia fondamente a la delegación asturiana, entá más nomada dende que Lisardo Lombardía entamara hai unos años a dirixir el Festival intercélticu. Fízolo gracies a una bandina y gracies tamién a que presentó un prestosu programa con xotes, pasacais y marches tradicionales, resaltáu con una danza de Cuideiru que prestó enforma al públicu.

Y nel puestu 62 toco-y salir a la Banda de Gaites Villaviciosa El Gaiteru, qu’amosó que la renovación que vien calteniendo nestos caberos años nun tardara n’aportar a un equilibriu que viose nes interpretaciones a lo llargo del desfile qu’encantaron al públicu del Festival.

  Categories:
Loading Facebook Comments ...