Portada Tecnoloxía Los blogueros asturianos axuntáronse pa entregar los sos premios añales y aldericar sobre la blogosfera

Los blogueros asturianos axuntáronse pa entregar los sos premios añales y aldericar sobre la blogosfera

by asturnet

A les cinco la tarde la Banda de Gaites Escuela de Musica Tradicional de l’A.P.A. del Conservatoriu Valle del Nalón recibía a los blogueros nel parque nel que s’asitia’l Centru de Referencia de la Cultura y la Llingua Asturiana “Casa de los Alberti” de Ciañu, en Llangréu. Pasu ente pasu, munchos de los creadores de blogues n’asturianu, diben aportando a la sala onde diba tener llugar la segunda edición del Sidra&Blogues. La primer edición tuviere llugar en 2007, y munchos coses camudaron dende entós na blogosfera en llingua asturiana. Notábense les ganes de volver a vese.

L’actu entamó col agradecimientu de la organización a los patrocinadores y collaboradores del eventu (Ayuntamientu de Llangréu, Softastur y Xareos! Xestión Cultural), y ceo entamaron les comunicaciones, abriendo les intervenciones David Guardado, Director Zona Atlántica Prensa Ibérica Dixital, que recordó la “prehistoria” de la rede n’asturianu, que según comentó “entamó de xente que nun taba averao al movimientu asturianista, pero que vía la importancia de tener conteníos nesta llingua dientro de la entós incipiente rede”. L’autor recordó la fecha de “1996” como la clave dientro de tou esti procesu, “yá que ye entós cuando apaecen los primeros númberos d’Asturnews y del precedente d’Asturies.com, el proyectu Espaciu y tiempu de la llingua asturiana”. Guardado recordó tamién les primers llistes de corréu y foros nos que s’usaba la llingua asturiana y como too ello foi evolucionando hasta la situación actual.

Darréu, el blogueru Mikel González improvisó una pequeña información sobre la nueva rede social n’asturianu “Ximiélgame”, que según comentó “va abrise a otres llingües” y nos próximos díes “va tar abierta a tolos usuarios que quieran facer usu de la mesma”.

Poli Mencía, Espertu en redes Sociales y diseñador de la campaña “Doi la Cara pola oficialidá”, dedicó la so intervención a comentar la rede de blogueros y usuarios d’internet en Galicia y la so evolución, faciendo comparanza cola asturiana, que según afirmó “ta a una distancia considerable en cuantes a la so evolución y normalidá”.

Rematáronse les intervenciones con “Escoyeta de Plataforma”, comunicación de Marquinos, co-autor del blogue “Ta pa Ponga” y espertu en software llibre, que comentó les ventayes y desventayes de caún de les plataformes mayoritaries de creación de blogues, destacando como más interesantes, “por poder funcionar con elles n’asturianu”, wordpress.org y nireblog.

Hacia les seis y media entregáronse los premios entamando pel de meyor diseñu 2009, qu’entregó’l blogueru Chus Solís, en representación de la blogosfera n’asturinau, al autor d’“El Xanu’l Caborniu”. Darréu, Marquinos, de la organización Softastur, entregó’l tercer premiu al responsable de “La verdá ye mentira”. El redactor d’Asturnews, Inaciu Galán, entregó’l segundu premiu como representante de Xareos! Xestión Cultural a “González y González”.

El primer premiu entrególu a “El Xanu’l Caborniu” el responsable del Serviciu de Normalización Llingüística de Llangréu, Eloi Antuña.

Los ganadores recibieron un llote cedíu por Softastur y el LoCo Team Asturianu consistenete en 4 CDs orixinales de la cabera versión d’Ubuntu 9.10, y dellos exemplares de la revista Formientu, cedíos por Xareos! Xestión Cultural.

La xornada terminó darréu con un alcuentru informal nun chigre cercanu a la Casa de los Alberti, onde los blogueros y los asistentes aldericaron y pudieron conocer les identidaes qu’escuenden munchos de los blogues n’asturianu más activos de la rede.

Tamién te podria gustar