“Los Berrones”, “Texedor” y “Silvidos y Gañíos” encabecen el cartelu musical de la Xira al Naranco

“Los Berrones”, “Texedor” y “Silvidos y Gañíos” encabecen el cartelu musical de la Xira al Naranco
26 xunu 09:12 2018 Imprimir

“Los Berrones”, “Texedor” y “Silvidos y Gañíos” encabecen el cartelu musical de segunda edición de la Xira al Naranco, la romería que va celebrase’l próximu 1 de xunetu y va incluyir, como novedá, una carrera al Naranco y una selmana previa d’actividaes culturales.

Uviéu va vivir el próximu 1 de xunetu una nueva y anovada edición de la popular Xira al Naranco. Esta selmana pasada presentáronla la vicealcaldesa, Ana Taboada y los conceyales Ana Rivas, Roberto Sánchez Ramos y Ricardo Fernández, amás de Carlos Llaneza, presidente de ‘Manos pol Naranco’.

“La participación de los uvieinos ye la clave na recuperación d’esta tradicional fiesta d’intermitente hestoria. La Xira ta entamada pola Asociación Manos pol Naranco y el Conceyu d’Uviéu, cola implicación de delles conceyalíes coordinaes dende la Área de Participación Ciudadana”, indicó Taboada,  de la qu’aportunaba en que “el Naranco ye la nuesa xoya y dende esti equipu de gobiernu queremos siguir visibilizándolo. Esta segunda edición, como novedá, va haber una carrera al Naranco y una selmana previa d’actividaes culturales”.
Les actuaciones musicales, animación infantil y escursiones pol Naranco van animar la xornada na área recreativa del icónico monte. El cartelu musical ta encabezáu nesta ocasión por “Los Berrones”, los hermanos Texedor y “Silvidos y Gañíos”, que van empezar a actuar a partir de les 14.30 hores. Primeramente, Milio’l del Nial va intervenir colos sos cuentos y narraciones nun actu presentáu por Alberto Rodríguez.

La Xira podrá realizase andando, en bici o, como novedá, corriendo. La organización previo que la carrera sala a les 11.30 hores de la plaza de los Ferroviarios (La Llosa). La inscripción ye gratuita, pero la participación ta llindada a 200 persones y ye necesariu inscribise na web www.321go.es. La salida caminando va ser tamién dende La Llosa o dende la Plaza de Gabino Díaz Merchán, en La Florida, a les 10.30 hores. Quien prefieran faer un itinerariu más curtiu pueden incorporase al altor de los monumentos del Prerrománicu, en San Miguel de Lliño, onde se van xunir  alredor de les 11 hores. Amás, el percorríu puede realizase tamién en bicicleta dende la plaza de Gabino Díaz Merchán, en La Florida, a les 10.15 hores.

A partir de les 12.30 hores, na área recreativa va haber distintes actividaes como visites empuestes a los pozos de nieve y los bunkers, una escursión BTT pol Naranco o talleres de cometes y xuegos tradicionales. Too ello va tar amenizao mientres la mañana pela Banda de Gaites Ciudad d’Uviéu y grupos folclóricos.

 

  Categories: