Los ‘Benois de la danse’, los Óscar de la danza, falen castellán

Los ‘Benois de la danse’, los Óscar de la danza, falen castellán
19 mayu 08:39 2016 Imprimir

Los premios Benois de la danse, consideraos los Óscar de la danza, falen castellán nesta edición. Alicia Amatriain llogró’l galardón a meyor baillarina y la Compañía Nacional de Danza d’España llevó’l de meyor coreografía.

“Toi nel país de les maravíes. Ye daqué bien especial”, confesó Amatriain al entamar la ceremonia celebrada nel llexendariu Teatru Bolshói de la capital rusa. Estrella del ballet de la Ópera de Stuttgart dende los 21 años, llogró’l galardón a meyor baillarina por dellos papeles, ente ellos el de Blanche Dubois n’Una tranvía llamáu deséu de John Neumeier. L’artista ye la tercera española que llogra esi prestixosu galardón creáu en 1992 con patrociniu de la UNESCO.

Amatriain, que reconoció tar nuna nube desque fuera nomada al premiu, yá triara’l Bolshói va trés años con Romeo y Julieta y Onegin. “El Bolshói tien un aura especial. Tien pantasmes corriquiando polos pasiellos”, dixo la baillarina, qu’abandonó con 14 años la so casa pa enrolarse na Cranko Schule de Sttutgart, una de les escueles de ballet más importantes nel mundu.

Ente los miembros del xuráu figuraba José Carlos Martínez, director de la Compañía Nacional de Danza d’España, quien comentó que “Alicia ye una actriz que bailla (…), daquién bien especial y que se merez ganar un Benois”. Martínez, que llogró’l premiu en 2009 como coreógrafu, destacó que la baillarina vasca “tien unes posibilidaes físiques impresionantes y amás tien yá un maduror, yá que bailló enforma repertoriu”.

  Categories: