Portada Música Los Bandos de Llanes: La Madalena, San Roque y La Guía, Premiu Nacional de Folclore “Martinez Torner 2019”

Los Bandos de Llanes: La Madalena, San Roque y La Guía, Premiu Nacional de Folclore “Martinez Torner 2019”

by redacción asturnews

Los Bandos de Llanes, La Madalena, San Roque y La Guía, algamaron el Premiu Nacional de Folclore “Martinez Torner 2019”, qu’otorga la Escuela Municipal de Música Tradicional del conceyu d’Uviéu.

El xuráu taba formáu por Yolanda Vidal (Conceyal d’Educación, del Conceyu d’Uviéu), que presidió la sesión; Manuel Fernández Gutiérrez (Coordinador Xeneral de la Escuela de Música Tradicional); Balbino Menendez (Profesor de Gaita d’Escuela de Música Tradicional); José A. Llaneza Álvarez (Profesor de Folclore d’Escuela de Música Tradicional); Roberto Fernández (Técnicu del Conceyu d’Uviéu), qu’actuó como secretaria del  mesmu, con voz pero ensin votu.

Destacaron que nun se puede concebir Llanes ensin los Bandos de Santa María Madalena, San Roque y La nuesa Señora la Virxe de la Guía. Una traza característica ente bandos son les rivalidaes, por cuenta de elles estos pervivieron dende sieglos.  La “piquilla” ye la cazumbre que-yos fai esforciar se, y brindar unes fiestes meyores que’l contrariu. Esisten numberoses anécdotes al respeutu, inclusive cantares y versos, que con ironía resalten les diferencies.

Tolo relativo a les fiestes ta regulao, tasao y midío hasta’l mas mínimu detalle por ancestrales costumes: los meses en que se celebren les fiestes, les cais de les sos procesiones, les places de les sos verbenas, les flores emblemátiques de cada bandu, la música les sos dances y tola so meticulosa puesta n’escena.

Los bandos  son agrupaciones de vecinos xuníos por un mesmu sentimientu y que traten de caltener la so independencia al traviés de los sieglos. D’una manera sorprendente sigui calteniendo eventos populares, deportivos, festivos y actividaes de too tipu mientres los trés meses centrales del branu un mes per cada bandu. El celu nel caltenimientu de les tradiciones y l’amor a Llanes de lo de los que los trés faen gala son capaces de movilizar a un voluntariáu ampliu pa poder dar más rellumanza a les sos fiestes.  El ricu folclore de Llanes atopó nos bandos el gran curio y lo que n’otros conseyos foise perdiendo en Llanes caltúvose nel tiempu.

Bailles como’l Pericote que cada bandu interpreta de distinta manera, con distintos matices, pero calteniendo la esencia de la danza, El xiringüelu de Naves, la jota de la Madalena, la danza d’Arcos, la danza de los pelegrinos, ritos como La foguera de la Madalena ,el caltenimientu y l’usu de la indumentaria tradicional llanisca, arréu que les  trés fiestes sían fiestes d’interés turísticu nacional. Toles distintes estrofes de les sos dances faen que’l folclor siga vivu nel conceyu de Llanes y fai que toes estes tradiciones pasen de xeneración en xeneración.

El premiu va ser apurríu nun actu’l próximu día 27 de Payares nel Auditoriu Príncipe Felipe a les 20h, con entrada llibre hasta completar aforu.

Tamién te podria gustar