Portada Convocatories Lorient va celebrar l’añu de Bretaña y los sos 50 años en 2021

Lorient va celebrar l’añu de Bretaña y los sos 50 años en 2021

by redacción asturnews

El Conseyu d’Alministración del  Festival Intercélticu de Lorient (FIL) axuntóse esti xueves 30 d’abril pela mañana y apautose en suspender la edición d’esti añu y apautase en que Lorient celebre l’añu de Bretaña y los sos 50 años n’agostu de 2021.

El Conseyu d’Alministración del  Festival Intercélticu de Lorient (FIL) axuntóse esti xueves 30 d’abril, dos díes depués l’anunciu del Primer Ministru na Assemblée Nationale axustando que “los grandes acontecimientos deportivos, culturales, inclusive los festivales, les grandes feries profesionales, tolos acontecimientos con más de 5 000 participantes que son oxetos d’una declaración na prefectura y que tienen d’entamase con muncha antelación, nun pueden celebrase antes de setiembre. Poro, la edición 2020 del Festival Intercélticu nun va tener llugar.
L’añu 2020 tendría de ser un gran momentu, el del añu de Bretaña y el del 50 aniversariu del FIL. Por cuenta de la epidemia de COVID-19, nun lo va ser. Poro, el FIL va celebrar l’añu de Bretaña y los sos 50 años del 6 al 15 d’agostu de 2021. Toos yá esperamos que sía una gran fiesta popular onde toes y toos celebren les cultures celtes, la so riqueza y la so diversidá.

El Festival estima a tolos intervinientes artísticos, institucionales y económicos que se movilizaren por que 2020 fuera un gran añu intercélticu. El Festival, nuna nota de prensa asoleyada esti xueves pela mañana,  “estima tamién a tolos sos voluntarios y emplegaos que yá se taben preparando arduamente pa la edición de mediu sieglu. La gran mayoría de los artistes previstos p’anguaño confirmaron la so voluntá de xunise a nós el próximu añu pa celebrar per tolo alto l’añu de Bretaña y un mediu sieglu de intercéltismu contemporaneu. Asina, mientres los próximos meses y según la evolución de les restricciones sanitaries, va poder construyise con serenidá un programa similar al de 2020. El Festival espera que, una vegada pasada la crisis, toes y toos tean presentes en Lorient pa faer del 2021 un añu memorable”.

El FIL sabe que l’aplazamientu de la so edición 2020 va tener impactos importantes sobre la economía cultural (artistes, emplegaos, personal intermitente del espectáculu, empreses de producción) y turística (agospiamientu, restauración, ociu, tresporte). L’estudiu realizáu en 2017 por AUDELOR acutaba alredor de 23M€ de gastos, y polo tanto d’ingresos, que nun se realizaren anguaño. El FIL sabe’l papel cultural, social y tamién económicu que tien en Bretaña y mide el pesu de la so decisión. Sicasí, como organización responsable, comparte la decisión del gobiernu sobro les grandes concentraciones de persones. Tamién creen que’l personal sanitario (hospital, seguridá civil, médicos d’urxencia, etc) y de seguridá (fuerces policiales y del poder), que’l so compromisu nesti difícil periodu ye estimáu por toos, van precisar un merecíu descansu dempués de dellos meses bien trabayosos.

L’aplazamientu del FIL a 2021 va tener de resultes una resultancia negativa en 2020, a pesar de que les de les instituciones públiques caltuvieron les subvenciones y de les donaciones de los mecenes privaos, a los qu’estimamos bonalmente’l so sofitu. En 2020, el FIL va tener que sufrir una perda financiera ente 0.2 y 0.3 millones d’Euros, dempués de dellos años positivos. Ye un golpe financieru duru. Al FIL gustára-y tanto “traer allegría, deséu, suañu, lluz a los cientos de miles de visitantes y espectadores, ufiertándo-yos una magnífica edición. Munchos grupos y artistes, y les federaciones Sonerion, War ‘l Leur et Kendalc’h, ufiertaríen-yos momentos inolvidables. Volvióse imposible”.

Sicasí, el FIL deseya “faer afayase a toes y toos aquellos qu’esperaben esti momentu únicu, el programa previstu pal 2020. Asina van conocer la riqueza y la novedá d’una programación que nun-yos decepcionó. Llueu van poder afayalo nel sitiu web del FIL. Inda van poder suañar”, fina la nota de prensa del Festival.

Tamién te podria gustar