Lorient: Nueches máxiques que nun s’escaecen

Lorient: Nueches máxiques que nun s’escaecen
15 agostu 09:53 2015 Imprimir

La cabera de les nueches máxiques afitaba na madrugada d’esti vienres l’ésitu d’esta fórmula d’espectáculu del Festival de Lorient. Un ésitu de públicu, cásique garantizáu en cuantes nun llueve, y una participación importante pala economía del festival. Y un ésitu artísticu nel qu’Asturies ta calteniendo un simbólicu puxu, contribuyendo dafechu a l’animación ente’l públicu.

La cuarta de les nueches máxiques dexaba afitáu l’ésitu de taquilla del Festival esti añu depués de qu’entamare l’espectáculu y se pudiere ver la primer nueche máxica dafechamente ensayada polos grupos que participen y ensin la torga mínima que supón el trabayu de grabación videográfica del espectáculu que se fai nos dos espectáculos anteriores, el martes y el miércoles pela nueche.

Una nueche más que máxica

La nueche máxica ye ensin dubies y dende l’aniciu del Festival hai cuarenta y cinco años la más importante de les cites de la programación. Esti martes y el miércoles pudo siguise un espectáculu braeramente impresionante que ye obligáu pa cualaquier que venga per primera vegada a Lorient nestes feches d’agostu y el xueves pela nueche, hasta los fueos artificiales colos que fina na madrugada, coprobose la maurez d’esti espectáculu ensin competencia.

La cadarma del espectáculu ye siempre la mesma, dende va munchos años, ameyorada hai un llustru con nueves imáxenes y aderezos de diseñu, pero paez nun repetise en cada ocasión. Un sólu de metal, un canciu galés que ye tan averáu al de nueso que paez que temos nun concursu de tonada, ya inclusu un coru, son escoyíos davezu pa entamar y dar pasu darréu a una banda de gaites, seya irlandesa o bretona. Porque ye a la banda escocesa a la que siempres se-y dexa la parte central pa qu’interprete “Verdes montañes” y esos grandes hits de la música scottish que tanto presten equí en Lorient dende siempre y que ún nun cansa de sentir.

El casu ye que la nueche máxica cuntó con eses interpretaciones clásiques y cola presencia de grupos que repiten añu tres añu, como el Keltika Highland Dance Team. Y xunta ellos tuvieron los representantes asturianosque salieron una nueche más en comuña a danzar nel estadiu de Lorient, onde se cellebren cada festival estes nueches máxiques: La Banda El Trasno de Cuaña y la La Kadarma de Nava, faciendo danzar al grupu Filandón de baille tradicional.

Tres d’una actuación perfecha de los asturianos y enforma apludida pol públicu de Lorient va desenvolviéndose’l mesmu programa de tolos años con pequenes variaciones. Hasta  qu’aporta’l momentu de la traca final: van allugándose nel centru l’estadiu la totalidá de les bandes y grupos participantes que tres desfilar y colocase en formación tornen mirar pala gran pantalla na que dende’l primer momentu van viéndose motivos de cada país participantes, dende castiellos d’Escocia a imáxenes de la Bretaña más tradicional, ensin escaecer los escudos y banderes de cada país celta participante. Y nesi mesmu instante, apágase la proyeición y entamen los fuegos artificiales colos que se fina cada nuechi. Hasta la siguiente que sedrá na primer fin de selmana d’agustu del añu 2016, añu de l’Australia, diez años depués…

Galería de fotos de la Nueche Máxica del FIL2015 en Lorient.

  Categories:
Loading Facebook Comments ...