L’Observatoriu de política llingüística urxe l’aprobación del plan de normalización

Aprobación inmediata’l plan de normalización, presencia “inescusable” del asturianu na radiotelevisión autonómica y apoyu al “intensu, rigorosu y positivu” llabor de la Xunta de Toponimia. Con eses reivindicaciones echó a andar güei l’Observatoriu de política llingüística, una plataforma impulsada por quince persones vinculaes a la cultura, la docencia y la política que naz pa sacar el máximu provechu de la política llingüística “qu’agora ye posible”.

Como principiu xeneral, l’Observatoriu defende que la normalización de la llingua asturiana “nun ye un problema, sinón la solución a un problema”, según ún de los promotores del collectivu, l’escritor Xuan Bello, y promete un asesoramientu “atentu, constructivu, independiente y críticu” del trabayu desendolcáu pola Oficina de Política Llingüística’l Principáu, dirixida por Ramón D’Andrés.

Con eses blimes, la nueva plataforma ciudadana albidra prioritaria la oficialización ensin demora de la toponimia tradicional, mesmo que l’usu del asturianu na publicidá institucional del Gobiernu, una meyor presencia d’esi idioma na enseñanza y el sofitu “políticu, técnicu y económicu” a la Rede de Normalización Llingüística nos Conceyos.

Na axenda inmediata del Observatoriu, qu’esti mediudía se presentó al públicu n’Uviéu, figuren entrevistes colos másimos responsables de la Conseyería de Cultura, Comunicación Social y Turismu, la primera d’elles con fecha prevista pal prósimu martes. A esos alcuentros acudirán representantes d’una plataforma na que participen, ente otros, el caderalgu Francisco Llera Ramo; el presidente’l Conseyu de Comunidaes Asturianes, Manuel Fernández de la Cera; y los escritores Berta Piñán, Vanessa Gutiérrez, Ramón Lluis Bande, Adolfo Camilo Díaz, Xandru Fernández, Taresa Lorences ya Ismael González Arias.

Completen la primer llista de miembros del observatoriu, abiertu a nueves incorporaciones, la diputada d’Izquierda Xunida-Bloque por Asturies Noemí Martín, el conceyal socialista n’Uviéu Gonzalo Olmos, el periodista Francisco Álvarez, el profesor José Uría y el catalán Ignasi Vila, miembru’l Comité Internacional pa la Salvaguarda de los Drechos Llingüísticos d’Asturies.

Archivu. Personalidaes vinculaes a la cultura echen a andar un “observatoriu” pa impulsar la política llingüística