Llucía Fdez. Marqués: “La cultura sidrera ta a piques de ser catalogada dientro’l Patrimoniu inmaterial de la Humanidá”

05 agostu 10:38 2011 Imprimir

Llucía Fernández Marqués (Xixón, 1974) ye la directora de la revista La Sidra, que lleva informando sobre’l mundu sidreru dende 2003 y ta a menos d’un añu de llegar al cientu de númberos editaos. La revista, que cunta con 100 páxines a tou color ta asoleyada pol Ensame Sidreru, que tamién entama otres actividaes como la Primer Sidre l’Añu. De la publicación y les sos actividaes falamos cola so responsable principal nesta nueva entrega de la Entrevista de la selmana.

-A menos d’un añu pa llegar a los 100 númberos de La Sidra, ¿qué balace faen del llabor?

-De bonu a meyor. Algamáronse los oxetivos colos que s’entamó a facer la revista, va cerca d’ocho años, y superáronse con creces; nun hai falta más que mirar una revista de les primeres y una de les d’anguaño. Consiguimos crear un referente nidiu de lo que ye la cultura sidrera asturiana, y non sólo a nivel nacional, sinón internacional.

 -¿Ónde tien más ésitu la revista, n’Asturies o fuera?

-N’Asturies, ta nidio. Bien ye cierto que tenemos un seguimientu ablucante nel estranxeru, que tenemos soscritores españoles, franceses, alemanes, galeses… Sicasí, nun hai comparación. Precisamente nos caberos tiempos tamos trabayando muncho la visibilidá de la sidra asturiana n’otros países, pero nesi campu queda munchu llabor.

 -¿Cunten con sofitu institucional abondo?

-¿Eso yera un chiste?, ¿qué quier dicir sofitu institucional? Eso debe ser daqué como les bruxes o los ovnis, dicen qu’esiste, pero nós nun lu vimos (rises). Chancies aparte, pa los eventos que celebramos recíbese dalgún sofitu (insuficiente) y pa la revista propiamente dicha, en toos estos años, dos subvenciones al por mayor. Si en cualesquier otra parte hubiere una revista con una actividá y un espardimientu asemeyaos a la de nueso, recibiría de xuru tolos sofitos del mundu, pero esto ye Asturies…

 -¿La so web lasidra.as ta siendo un ésitu, a qué cree que se debe?

-L’Esitu de la nuesa web ye tan impresionante que nos mesmos tamos ablucaos. Déxame que te comente los datos de güei, por exemplu, pero teniendo en cuenta que meyoren prauticamente día a día.

Lasidra.as ta nel puestu 584.925 de les páxines más visitaes del mundu y nel puestu 8.059 nel Estáu español. Si nos averamos un pocu más, vemos qu’en Xixón tamos nun impresionante puestu 36 , mui per delantre de uebs comu la del Ayuntamientu mesmu, y amosando un xorrecimientu trimestral del 2.200 %, son cifres que falen por si soles. Quien quiera comprobalo, los datos asoléyense en www.alexa.com, la páxina de posicionamientos más fiable a nivel mundial.

El porqué d’esi ésitu maxino que bien de dos fontes, per un llau la sidra interesa, la xente quier saber lo que pasa, lo que pasó y lo que va pasar na so rodiada. Pel otru, una actualización cuasique diaria y una cobertura d’eventos y noticies que nun se pue alcontrar en dengún otru llau, nin n’internet nin en prensa escrita, información detallada de tolos llagares asturianos y d’abondes sidreríes, siguimientu continuu de cuestiones comu’l Campeonatu d’echadores de sidra y de la evolución de les coleciones d’etiquetes, tou esto n’asturianu ya inglés, una descomanada galería de semeyes de gran calidá… El secretu del ésitu ye muncha información… y munchu trabayu.

-La revista entama amás concursu de semeyes, de microrrellatos… ¿la sidra amuésase en tolos requexos de la cultura?

-La sidra amuésase en tolos requexos de la cultura y de la vida asturiana.

-¿Cómo valoren la celebración de la Primer Sidre l’Añu?

-Otru ésitu ablucante.

-¿Ta afitada yá la cita na axenda festiva xixonesa?

-Por supuestu faise pa seguir, nun pescanciamos la forma de trabayar de dalgunos otros eventos que son pan pa güei y fame pa mañana, la Primer Sidre l’Añu nació pa xorrecer, cola idega de dir faciéndose más fuerte y completa añu tres añu, queremos que se torne nun referente no que cinca a festividaes sidreres.

-¿Qué otros proyectos tien en marcha l’Ensame Sidreru, editor de la revista?

-Namás pa esti mes, el Tour del Llagar y la representación d’Asturies nel International Craft Cider Festival. Más p’alantre, participaremos nel Festival de la Mazana de Villaviciosa, concederemos el IV Premiu de Semeyes de LA SIDRA, espondremos les semeyes premiaes n’anteriores años nes fiestes de Pión y en dellos chigres, convocaremos el III Premiu d’ensayu Emilio Trabanco Trabanco, cellebraremos la Primer mayada y espicha, los Sidrocoles, el I Salón Internacional de les Sidres de Gala… eso pa esti añu.

 -La sidra tuvo momentos nos que tuvo a piques de desapaecer como bebida tradicional asturiana, ¿ta garantizada la so supervivencia anguaño?

-La sidra ye una de les estayes económiques más puxantes n’Asturies, non solo los llagares, sinón qu’esiste toa una rede económica venceyada a ella. El so consumu forma parte del día a día de los asturianos, y nun toi cierta de que se puea falar de posible desapaición cuando, arriendes de los cuasique cien llagares industriales, milenta asturianos continuaron faciendo sidra en casa -como s’amuesa na descomanada cantidá de llagares privaos que siguen furrulando-. Si ye verdá qu’hubo tiempos peores, pero nun creo que puea falase de desaniciu de la sidra asturiana. Préstame camentar que, na midida qu’Asturies siga esistiendo como tal, la sidra tien garantizada la so supervivencia.

 -¿Qué fadría falta p’apoyala dende les instituciones d’una forma afayadiza?

-Por supuestu. Nun ye de recibu que daqué de la importancia de la cultura sidrera, que ta a piques de ser catalogada pola UNESCO dientro’l Patrimoniu inmaterial de la Humanidá, tea de ser caltenío por iniciatives privaes.

  Categories:
Loading Facebook Comments ...