Llera pide la oficialidá agora y califica la situación actual de anticonstitucional y retrógrada

03 xunetu 23:18 2005 Imprimir

El caderalgu de la Universidá del País Vascu, director del Euskobarómetro y académicu de la Llingua, Francisco Llera Ramo, pidió esti sábadu 2 en Bimenes na celebración de la Fiesta de la Oficialidá nun retardar más el reconocimientu llegal qu’equipare al asturianu colos otros idiomes del estáu cooficiales nes sos comunidaes. Nel so pregón, Llera tuvo dures palabres pa los que dende les sos responsabilidaes institucionales renuncien a la oficialidá de los que dixo actúen asina por “complexos ancestrales, pereza intelectual y galbana ideolóxica».

Pal pregoneru de la IX Fiesta de la Oficialidá de Bimenes la situación actual na que s’alcuentra la llingua asturiana -la única del estáu ensin reconocimientu llegal como idioma oficial- ye “una inxusticia que mos marxina, que mos arrequexa como ciudadanos de segunda y que ye inconstitucional y retrógrada” y reclamó, aprovechando la coincidencia col Día del Arguyu Gai en Madrid “qu’Asturies salga del armarniu” pa dexar atrás “la nueche política de la negación de los drechos llingüísticos de los asturianos”.

Francisco Llera Ramo animó a los ciudadanos comprometíos col restablecimientu de los derechos llingüísticos a sumar voluntaes nesa xera “ensin radicalismos nin irredentismos” y amosó el so enfotu nel ésitu d’esti procesu pola normalización social y el reconocimientu llegal del asturianu: “esto ya nun hai quien lo pare”, afirmó contundente p’alendar a que s’entame una auténtica “mareona” de xente y voluntaes p’algamalo.

Llera Ramo, miembru destacáu del Partíu Socialista d’Euskadi (PSE), onde llegó ocupar responsabilidaes, tien amosao n’abondes ocasiones les sos fondes discrepancies y la so incomprensión énte la postura caltenida polos sos compañeros de la F.S.A. énte la cuestión llinguística asturiana.

Munches de les puyes llanzaes nel so pregón de Bimenes contra los que son cabezaleros de lo que calificó como “renuncia institucional” a la oficialidá abulten llamaos esplícitos d’atención a los responsables políticos socialistes asturianos, radicalmente contrarios a la equiparación del asturianu colos otros idiomes del estáu al pesar de les voces, cada vez más numberoses nel senu del so partíu que piden un cambiu de rumbu nesi sen.

La so última intervención pública n’Asturies, foi con motivu del pasu pela Comisión de Cultura de la Xunta Xeneral, na que después d’emponderar el Plan de Normalización Social pa la llingua asturiana como “un primer pasu” insistió na necesidá del reconocimientu oficial del nuestru idioma como la única garantía pa facer efectivu cualquier entamu de normalización.

  Categories:
Loading Facebook Comments ...