Llega’l tráiler de ‘Apocalypse Now Final Cut’, la “meyor versión” del clásicu de Coppola

04 agostu 08:45 2019 Imprimir

Apocalypse Now ye unu de los grandes clásicos del séptimu arte. Y ye que la película de Francis Ford Coppola va volver de nuevu a los cines con Apocalypse Now Final Cut, un nuevu montaxe de la cinta, el meyor” según el so director, que llanzó’l so tráiler esti xueves.

L’adelantu de Final Cut empecipia con unes declaraciones de Francis Ford Coppola, que destaca l’ameyoramientu de la película. Para Coppola, ésta ye “la so versión favorita” de Apocalypse Now: “Creo que la primera yera demasiáu curtia, y Redux yera demasiáu llarga. Ésta ye la meyor”.

El director allaba esta versión, que s’escucha y vese meyor gracies a la restauración en 4K. L’adelantu inclúi, amás, dalgunos de los grandes momentos de la mítica cinta, como la frase icónica del coronel Kilgore: “Gústame’l golor del napalm pela mañana”.

Dempués de qu’en 2002 estrenárase Apocalypse Now Redux, la versión supuestamente ameyorada de la cinta orixinal qu’añedía casi una hora de metraxe, Coppola paez seguro de qu’esti Final Cut ye’l montaxe verdaderamente correctu.

La nueva versión de la cinta, que se va estrenar n’Estaos Xuníos el próximu 15 d’agostu, nun va llegar a los cines españoles. Ye d’esperar, sicasí, que Apocalypse Now Final Cut llegue a España en formatu domésticu, daqué entá por anunciar.

  Categories: