Llega la tercer edición del Festival Al Resve de Xixón

El Festival Al Resve algama anguaño la so tercer edición y failo calteniendo’l so espíritu inicial: convertir per unos díes el barriu de Cimavilla nun espaciu dinámicu d’alcuentru onde se dean cita la cultura asturiana, la música del país, el teatru y l’arte polo xeneral de la nuesa comunidá.

Pa ello, el meyor momentu ye setiembre, tiempu de les tradicionales Fiestes de la Virxe de los Remedios y la Virxe de la Soledá, qu’empiecen casi al empar que’l Día d’Asturies, el de la Santina, qu’en tolos conceyos celébrase remembrando antigües tradiciones. Y del 7 de setiembre de 2022 al 18 de setiembre de 2022 Cimavilla va facelo cola cultura de nueso como referente.

El Festival Al Resve ufierta a quien deseyen averase a esti barriu emblemáticu un programa d’actividaes variáu, gayoleru y sollerte a la sensibilidá y les preferencies de tolos públicos, ente los que tienen cabida los más pequenos y los de más edá. Quieren que toes y toos tean representaos na  ufierta d’anguaño… o, siquier, que tol mundu atopara un momentu p’averase y esfrutar del bon facer de les y los artistes y creadores a los que conviden a participar d’esti tiempu festivu.