Portada Sociedá Llaranes sumase a Garbatella (Roma) y Usera (Madrid) nun proyectu de memoria colectiva

Llaranes sumase a Garbatella (Roma) y Usera (Madrid) nun proyectu de memoria colectiva

by redacción asturnews

Llaranes sumase a Garbatella (Roma) y Usera (Madrid) nun proyectu cultural de memoria colectiva. Ye una iniciativa comuñal y participativa de la conceyalía de Cultura qu’arrinca esta selmana col entamu del trabayu de campu y va reflexar n’una aplicación móvil que va recoyer les vivencies personales de vecinos y vecines del barriu avilesín.

Va llevalu a cabu’l xestor cultural Fernando Sánchez-Cabezudu, residente anguaño na Academia d’España en Roma onde realiza parte del proyectu storywalker que, nel casu d’Avilés, va llevar por nome “Histories de Llaranes”.

Llaranes, Garbatella (Roma) y Usera (Madrid) tienen enforma de mancomún: son barrios que la so identidá social vien determinada pol orixe de los sos habitantes, que llegaron a ellos atraíos poles posibilidaes de trabayu y procedentes de distintos llugares d’Asturies y España, nel casu de Llaranes, de Roma y otres ciudaes italianes, nel de Garbatella, y de la provincia china de Qingtian nel de Usera.

L’orixe del pobláu de Llaranes atopase na llegada de ENSIDESA a Avilés nos años 50 del sieglu XX y na construcción del barriu per parte de la empresa para acoyer a el trabayadores y les sos families, de bien diverses procedencies.

De manera similar, trés décades antes, a finales de los años 20 del sieglu pasáu, construyóse Garbatella en Roma: pa dar agospiamientu a los obreros que trabayaben nel gasómetru de la ciudá.

Y, muncho más apocayá, una numberosa comunidá China empezó a instalase n’Usera y convirtióse n’una de les poblaciones identitarias del barriu madrilanu.

Esti nexu común ente Llaranes, Garbetella y Usera ye’l que Fernando Sánchez-Cabezudu utilizó pa dar forma a storywalker un proyectu artísticu col que pretende rescatar los relatos y vivencies de los sos habitantes p’amosalos al traviés d’una aplicación móvil y de un relatu escénicu susceptible de ser interpretáu sobre un escenariu.

Con storywalker consiguió una de les prestixoses beques de l’Academia d’España en Roma que-y dexará desenvolver la so actuación en Garbatella mientres 9 meses y que en Llaranes va llevar a cabu cola collaboración de la conceyalía de Cultura del Conceyu d’Avilés. Según él mesmu reconoz, “Avilés cunta con una de les programaciones permanentes n’artes escéniques más interesantes nel contestu nacional y convirtióse nun llugar de referencia pa estrenos teatrales”.

Col so storywalker de Llaranes -que va llevar por nome “Histories de Llaranes”- pretende completar esta actividá cola participación activa de los sos vecinos y vecines dende la mesma creación, a partir de los sos relatos sobro’l so sentimientu de pertenencia y vinculación col barriu y de manera que puedan entrar en diálogu con otros barrios d’otres ciudaes.

Sánchez-Cabezudu esplicó qu’en storywlalker, “el protagonista y xenerador d’hestories ye’l mesmu vecín que col so relatu contribúi a la creación d’un imaxinariu común col restu de la ciudadanía”. De siguío, dramaturgos y ceadores escénicos van tomar como base estos relatos pa ufiertalos al restu de la ciudá como una rede universal d’hestories humanes. El venceyu ente ceadores y vecinos ye, al pie de la narración ciudadana, unu de los puntos fuertes de storywalker.

Más información

Tamién te podria gustar