Llangréu y la Comarca la Sidra celebren la Selmana de les Lletres esta fin de Selmana

Redacción.

Dende va unos años, l’asociación ‘El Ronchel’ de Villaviciosa vien faciendo’l repartu de lletres de pan envueltes nun papel con un testu n’asturianu ente la población del so conceyu pa conmemorar el Día de les Lletres Asturianes. Esti añu, dende la Mancomunidá van esparder esa actividá a tola Comarca, faciendo’l repartu de 4000 d’estes lletres ente chigres, escueles, cases de conceyu y otres entidaes.

El repartu va facese güei a lo llargo del día nos seis conceyos que componen la Comarca la Sidra (Bimenes, Cabranes, Colunga, Nava, Sariegu y Villaviciosa). A les 11, va facese un actu simbólicu d’entrega d’estes lletres a los alcaldes y autoridaes de la Mancomunidá Comarca de la Sidra.

En Llangreu a les 20.15 hores del vienres, nel Nuevu Teatru La Felguera, va facese presentación del llibru ‘La Asturianá: de la magia a la desolación’, obra del escritor y estudiosu de l’Asturianá Oscar Roces Arboleya. L’actu “nun pue definise solo como una presentación sinón que va más allá y conviertese nun espectáculu variáu nel que se combinen cine, canción y poesía”, según los organizadores. La presentación del actu va correr a cargu de dos figures relevantes de la cultura asturiana, Gabino Busto Hevia y Pablo Rodríguez Medina, la canción y la música asturiana van ponela Bibiana Sánchez García, Hector Braga, Valentín Fuentes y Francisco Jose Fernández Fernández.