Llangreú celebra les III Xornaes Culturales de Castilletes y Carbón

07 05:40 2012 Imprimir

Per tercer añu consecutivu, la Fundación Nuberu y l’Ayuntamientu de Llangréu organicen les xornaes culturales De Castilletes y carbón. Trátase de la tercer edición d’una actividad de dinamización cultural qu’estes dos entidaes ponen en marcha como consecuencia del conveniu de collaboración firmáu ente elles. Estes xornaes xiren alredor de les interrellaciones ente mina, música, lliteratura, economía, gastronomía… y s’articulen nuna serie de ponencies sobre estos temes, Los Xueves de Castilletes y Carbón, na Casa los Alberti, que rematen con un conciertu del grupu Nuberu nel Teatru L’Entregu’l día de Santa Bárbola, esti conciertu tuvo llugar l’añu pasáu nel Nuevu Teatru La Felguera y la idea ye da-y movilidá per tol Valle’l Nalón manteniendo’l Centru de Referencia de la Cultura y la Llingua Asturiana Casa de los Alberti como sede del ciclu ponencies.

El xueves 8 de payares, a les 20:00 hores, Enrique Fernández Rodríguez, economista y alcalde de Samartín del Rei Aurelio, va poner la conferencia Dellos conceptos de pedagoxía económica, abriendo los actos d’estes xornaes.

El xueves 15 de payares a les 20:00 hores va poder sentise la conferencia del famosu cocineru y presentador de televisión Cristian González Mina y cocina nel Valle’l Nalón. Una selmana dempués, el xueves 22 de payares, va ser Ana María Cano González, doctora en filoloxía romana y presidenta de l’Academia de la Llingua Asturiana la que llea la conferencia La Universidá d’Uviéu y la llingua Asturiana. Pa rematar el ciclu charres, el 29 de payares, con guión y dirección de Chechu García, los escritores, Manuel Asur, Xurde Álvarez, Pablo Texón, Lurdes Álvarez, Henrique Facuriella, Xosé Ramón Martín Ardines y Roberto Corte van facer el recital lliterariu Compañeru dame tira.

Va ponese’l ramu a estes xornaes con un conciertu de Nuberu nel Teatru L’Entregu’l 4 d’avientu, día de Santa Bárbara, patrona de la minería.

  Categories:
Loading Facebook Comments ...