Llamazares propón “un cambéu de ciclu con una mayoría d’izquierda” y el retornu a Asturies del capital humanu

23 abril 10:08 2015 Imprimir

El candidatu d’IX a la presidencia d’Asturies, Gaspar Llamazares, participó esta mañana nun actu entamáu per Asturies Puntu d’Alcuentru pa esplicar les sos llínees programátiques pa la próxima llexislatura: “un cambéu de ciclu con una mayoría de ciclu”. La llucha contra la desigualdá, la protección, sostenimientu y desenvolvimientu de los servicios y prestaciones sociales, xuntu con una ordenación de l’área metropolitana central d’Asturies, un apueste claru por caltener el sector industrial como elementu clave de la economía rexonal, la oficialidá de la llingua asturiana y la potenciación de la Universidá van ser les sos exes d’acción, anunció’l candidatu a una numberosa representación de los distintos sectores económicos y ciudadanos de Asturies.

El próximu 24 de mayu, señaló Llamazares, “Asturies enfrentase a unes elecciones autonómiques cruciales, nes que se tien qu’escoyer ente’l cambéu d’aldu o’l continuismo qu’ufierta’l bipartidismu sufríu”. Llamazares foi enforma claru: “Preséntome col convencimiento de que’l cambéu de ciclu que reclama la mayoría social ten de tar lideráu por un proyectu políticu alternativu p’Asturies, ambiciosu y posible, ensin ambigüedaes calculaes y nítidamente d’izquierdes.”

Les exes d’esi nuevu proyectu políticu, resumió’l candidatu d’IX, estructurense en mas desenvolvimientu, mas derechos y mas democracia, con un oxetivu final:: “que gane Asturies”. Un nuevu modelu territorial, vertebráu en redol a la área central de Asturies, d’una Asturies “que saque partíu a la so identidá, a los sos recursos naturales y culturales, qu’apueste pola calidá ambiental en llugar de la macroincineración de residuos y la polución impune del nuesu aire”.

La Universidá ye otra de les piedres angulares del proyectu d’IX para Asturies, nun planteamientu nel que, a xuiciu de Gaspar Llamazars ye imprescindible la mayor conexón posible col texíu industrial de la institución académica, “Col talentu humanu d’Asturies al traviés de la Universidá, como motor selectivu de los procesos d’I+D+i, pa impulsar un nuevu modelu de calidá más sostenible, sofitáu na industria y la minería, n’otros sectores estratéxicos como’l agroganaderu, forestal, turísticu o pesqueru, nes PYMES y nuna rede de polígonos de la conocencia. Con una Asturies llíder d’un lobby de rexones industriales”.

Pal candidatu d’IX “ye tamién ye imprescindible pensar nes persones que tuvieron qu’emigrar, aprovechando esi capital humanu repatriáu de la Asturies Esterior”. “Hai que conectar el saber faer de los nuesos emigraos coles bones práctiques que se desenvuelven nel nuesu territoriu físicu, creando redes de profesionales nel esterior qu’amuesen el valor añedíu que pue suponer la so vuelta pa empleadores asturianos.”.

  Categories: