Llamazares pide midíes urxentes pa evitar la ruina del monesteriu de Cornellana

El diputáu nacional d’IX, Gaspar Llamazares, denunció güei el deterioru del monesteriu de Cornellana y reclamó que se realicen inversiones urxentes qu’eviten la ruina total. L’estáu del edificiu, a xuiciu del parllamentariu ye “deplorable, casi de ruina”, polo qu’habría que pidir una intervención urxente, y la execución íntegra del conveniu.

Llamazares anunció que, dada la so importancia pal patrimoniu artísticu, non yá d’Asturies sinón dientro del panorama internacional, IX va intentar, por aciu iniciatives parlamentaries, que se tomen midíes pal so caltenimientu, ente elles fondos del 1% cultural. L’oxetivu, esplicó, ye evitar qu’esti deterioru pueda convertise nuna perda irreparable”.

Llamazares allegó a Cornellana convidáu pola plataforma vecinal “Salvemos la Ilesia y el monesteriu de Cornellana”, un grupu que’l so oxetivu ye, precisamente, lluchar contra’l deterioru d’esti emblemáticu conxuntu arquitectónicu. Unu de los responsables de la plataforma, David Viliela, esplicó la importancia de que toa Asturies conoza l’estáu d’abandonu del edificiu, cola fin de xenerar una conciencia empobinada al so arreglu.

Viliela recordó qu’en 1999 roblóse un conveniu ente’l Principáu d’Asturies y el Gobiernu Central, que prevía inversiones pala so recuperación. Sicasí, namái la comunidá autónoma cumplió los sos compromisos. “Creo qu’hai unos presupuestos aprobaos del 2007, por valor de 5,8 millones, de los que nun vimos nada porque fuéronse roblando convenios n’años socesivos hasta unu de 2011, nel que se paralizó totalmente y agora creo que quieren destinar una parte mínima d’ayuda pa intentar qu’esto non se venga a lo fondero, pero en sí, naide ta tomando parte en nada”.