Llamazares convida a los partíos a llograr la oficialidá

by redacción asturnews | noviembre 10, 2017 6:21 pm

Llamazares convido esta mañana de vienres a los partíos a “nun refugar el momentu decisivu para llograr la oficialidá del asturianu”, abogando pola reforma del Estatutu y por un modelu “a l’asturiana”, no que camienta que ye “llevar a les lleis lo qu’opinen los asturianos”.

Gaspar Llamazares, voceru parlamentariu d’IX na Xunta Xeneral, alvirtió esta mañana qu’Asturies “atópase nun momentu decisivu” pa llograr la oficialidá de la llingua énte’l que les fuerces polítiques nun pueden refugar la responsabilidá”. Al so xuiciu nun ye un asuntu de la Constitución sinón del Estatutu d’Autonomía. “Ye un asuntu asturianu”, alvirtió en referencia al PSOE qu’alude a la reforma de la Constitución p’allargar los tiempos”. En referencia a Podemos, qu’ayeri faló d’una co-oficialidá a la valenciana, Llamazares esplicó al termino de la comisión d’estudiu sobro l’asturianu nel Parlamentu que “nun sé si a la valenciana, a la murciana, l’andaluza, pero creo qu’a l’asturiana, ensin dulda”, esplicó en referencia al modelu de cooficialidá que podría dase.

Llamazares aseguró a los periodistes qu’esperaben na Xunta Xeneral conocer el calendariu de tramitación del primer borrador de conclusiones de la comisión impulsada por IX, qu’ésti “ye un retu bien importante”. Pa Llamazares “tamos en condiciones de que lo qu’asocede na cai pase tamién nes lleis. La mayor parte de los asturianos quier la oficialidá y los grupos políticos asturianos lo que tenemos que faer ye tresformar la opinión de los asturianos n’opinión llegal, primero nel Parlamentu y depués na reforma estatutaria”.

Sobro la posición del PP distintu n’Asturies a la d’otros llugares onde impulsó y desenvolvió la oficialidá d’otres llingües, el voceru d’IX espera “que dempués de que vieran les encuestes los partíos políticos sepan lleer la opinión de los ciudadanos y, por tanto, que los ciudadanos quieren la oficialidá y que nada tien que ver cola reforma de la Constitución nin con Cataluña. Nada”. “Tien que ver con una demanda que ta prácticamente ensin cumplir dende la ellaboración del Estatutu”, concluyó.

La comisión afitó güei una axenda de trabayu pal desenvolvimientu del dictame, dempués de que Concha Masa, como presidenta de la mesma, ellaborara y presentara esta selmana’l primer borrador. Na xunta d’esta mañana los grupos afitaron hasta’l 19 de xineru’l plazu pa presentar les sos aportaciones. Una vegada esto asoceda, la presidenta reelaborará esti primer borrador y va consensuar les conclusiones col restu de grupos. Pa Concha Masa ye necesario “llegar a un alcuerdu porque les circunstancies sociales y polítiques son bastante afeches pa consiguilo”, como declaró esta mañana. La posición política de cada grupu nun va camudar, a lo menos la de dalgunos, pero “creo que vamos llegar a un consensu pa ellaborar les conclusiones”, dixo a entrugues de los medios de comunicación.

Source URL: http://asturnews.com/llamazares-convida-a-los-partios-a-llograr-la-oficialida/