Llamazares camienta improcedentes les declaraciones de Feito sobro l’asturianu

by redacción asturnews | mayo 16, 2018 10:37 am

Llamazares considera inoportunes, esaxeraes ya improcedentes les declaraciones de Feito sobro l’asturianu y convida al Presidente de la FADE a esmolecese fundamentalmente del sector empresarial y del so futuru y recuérda-y que tamién son empreses les que realicen la so actividá entorno al asturianu.

Gaspar Llamazares, voceru parlamentariu d’IX na Xunta Xeneral, consideraba esti martes que les declaraciones nes que’l Presidente de la Fade, Belarmino Feito, emplaza a los grupos parlamentarios que cuantifiquen lo que puede costar la oficialidá del asturianu son “inoportunes, esaxeraes ya improcedentes”. De primeres, esplica Llamazares, podríase-y responder a Belarmino Feito que “zapateru a los sos zapatos”, esto ye, que la FADE esmolézase fundamentalmente del sector empresarial y del so futuru. De segundes, podría preguntar si en realidá con eses palabres representa tamién a un sector empresarial que n’Asturies realiza les sos actividaes en redol al asturianu y la cultura tradicional, piensa Llamazares. “Creemos que non”, alvierte’l voceru d’IX. Una tercer cuestión que podría plantegase, nel mesmu tonu empresarial, ye si nun valoró la importancia que tien l’asturianu pa la marca Asturies, cuando ye importante, repite’l diputáu d’IX.

IX dulda de la representatividá d’esa esixencia del presidente de la FADE a les fuerces polítiques y encamiénta-y clara y vivamente a la FADE que s’esmoleza de lo fundamental pero tamién s’interese pol sector empresarial que se desenvuelve y actúa n’asturianu, conclúi Llamazares.

Source URL: http://asturnews.com/llamazares-camienta-improcedentes-les-declaraciones-de-feito-sobro-lasturianu/