Llacín ye declarada campeona nel Concursu de Bandes del Festival de San Patricio

18 marzu 00:42 2007 Imprimir

La Banda Gaites El Llacín de Porrúa foi declarada Campeona del Concursu de Bandes del Festival de San Patricio 2007 celebráu na capital Irlandesa, Dublin, el pasáu sábadu 17 de marzu na que yera la so primer participación nesos actos de cellebración del Día de San Patricio.

La banda asturiana actuó nel Gran Desfile de San Patricio’l día 17 de marzu y ufrió amás los sones de la gaita asturiana en dellos escenarios de la capital de la República d’Irlanda nel so día nacional.

La banda llanisca quedó per delantre d’otres formaciones de países como Irlanda los Estaos Xuníos o Escocia llogrando un total de más de 74 puntos sobre 100.

La Banda Gaites Llacín surde nel Conceyu Llanes nel añu 1998 pente los escolinos de la Escuela de Música Tradicional que pertenez a l’Asociación Cultural y Etnográfica Llacín de Porrúa. Esta asociación convirtiose pasu ente pasu nun referente como promotora d’iniciatives güei reconocíes, como’l Muséu Etnográficu del Oriente d’Asturies, el Mercáu de Porrúa y el Pueblu Cultural d’Europa, arriendes d’otres. Too ello fizo-y algamar un llugar cimeru nel desendolcu y nel estudiu de les manifestaciones culturales del conceyu llaniscu, y ser un puntu d’alcuentru pa tolos/es que tengan daqué enfotu nel conocimientu de los vezos y la hestoria d’Asturies . Dende los sos anicios , la Banda ta dirixida por Vítor Carbajal y Nuria Tarodo medrando a lo llargo’l tiempu de los 28 a los 87 componentes de los nuesos díes faciendo asina una de les bandes más numberoses d’Asturies.

  Categories:
Loading Facebook Comments ...