Portada Educación L’Institutu Isla de la Deva denuncia la falta del profesor de Llingua

L’Institutu Isla de la Deva denuncia la falta del profesor de Llingua

by redacción asturnews
Foto: srgpicker (https://www.flickr.com/photos/srgblog/)

L’alumnáu matriculáu en Llingua Asturiana del Institutu Isla de la Deva lleva dende l’entamu del cursu ensin profesor titular, que de la mesma ye tutor d’una de les aules de primeru de la ESO.

La Conseyería d’Educación otorgó la plaza en septiembre a una profesora, que se quedó de baxa per enfermedá antes inclusive d’empecipiar les clases. De magar, magar pidise en repitíes ocasiones, nun se cubrió’l puestu.

L’equipu directivo y docente, según les families de los menores afectaos, unos 127 en total, punxéronse d’alcuerdu pa reclamar un docente y van recoyer firmes solicitando una xunta en persona cola conseyera d’Educación. «Nestos momentos ta desaniciándose la falta d’esta persona col profesoráu esistente, que fai más hores por que nun se note tanto, pero nun podemos tar asina tol cursu», destaquen nel centru escolar. Anque la situación nun ye esclusiva de la Isla de La Deva, equí la situación ye «especialmente complicada porque la persona que falta ye tutora d’un grupu. Lo peor ye nun saber si esto va tener solución a lo llargo del cursu», espliquen dende la xefatura d’estudios.

Les families tán cansaes d’esperar y tarrecen qu’esto pueda afectar directamente al alumnáu. Los más mayores, los matriculaos en bachilleratu, dependen d’esta nota por que-yos faiga media nos sos espedientes. «Fai media, ye computable pa depués aportar a la Universidá. Anguaño cada décima cuenta y nun podemos dexar nel aire esta nota», aprofien tanto nel centru como les families afectaes.

Dende’l Principáu afirmen tar trabayando p’abrir la bolsa de la especialidá y asina poder cubrir les vacantes, anque nun pueden precisar feches concretes nes qu’esi trámite podrá llevase a cabu.

Tamién te podria gustar