Portada Educación L’IES de Luces estrena un novedoso grau de ganadería únicu n’Asturies

L’IES de Luces estrena un novedoso grau de ganadería únicu n’Asturies

by redacción asturnews
Foto: srgpicker (https://www.flickr.com/photos/srgblog/)

La ufierta formativa del IES de Lluces (Colunga) va xorrecer esti próximu cursu cola implantación d’un nuevu grau pioneru y únicu n’Asturies. Tratase del títulu de Técnicu Cimeru en Ganadería y Asistencia en Sanidá Animal, que va tener una duración de dos años y yá cunta con delles persones comenenciudes.

La idea, esplicó la directora del centru, Elsa Carbonell, lleva maureciendo y reclamándose dellos años, polo que l’aprobación per parte del Gobiernu rexonal foi una «inmensa allegría». Gracies a esti nuevu grau cimeru, los alumnos van aprender tolo necesario para xestionar esplotaciones ganaderes, pero tamién van cuntar con una gran carga formativa enfocada a la cría y adomadura de caballos y van preparase para ser asistentes de veterinarios. Esto traduzse, aprofiaba ayeri la directora del IES de Lluces, «en delles salíes profesionales estremaes». Ente elles: encargáu d’esplotación ganadera; responsable d’inseminación artificial n’esplotaciones ganaderes o centros de recoyida de semen; responsable de ganaderíes equines; visitador de productos de veterinaria; ayudante de veterinaria n’equipos especializaos n’animales de granxa y producción, n’esplotaciones ganaderes, n’empreses del sector agroalimentario y de servicios a la ganadería; y asesor y supervisor pa la planificación, montaxe y funcionamientu d’empreses y entidaes acomuñaes a eventos, espectáculos, demostraciones ecuestres, actividaes recreatives, deportives y terapéutiques (hipoterapia).

Nel centru yá recibieron llamaes de persones interesándose polos nuevu estudios y cunten con formar un primer grupu d’unos 25 alumnos. Amás, cuando’l grau tea a plenu rendimientu prevese que la plantiya docente aumente en «dos o trés» profesores. En relación a les infraestructures, nun va ser necesaria nenguna gran obra, pos l’institutu cunta con una esplotación ganadera de lleche ecolóxico con unes cuarenta cabeces de ganáu de les que se faen cargu los alumnos del ciclu de Producción Agroecológica, «los principales interesaos nestos nuevos estudios».

Tamién te podria gustar