Liam Gallagher publicará’l 12 de xunu ‘MTV Unplugged’

15 mayu 09:11 2020 Imprimir

Liam Gallagher va publicar el 12 de xunu’l so discu ‘MTV Unplugged’, frutu del conciertu nel clásicu formatu acústicu producíu pola cadena musical MTV y que fuera retardáu por causa de la pandemia de coronavirus.

Foi’l pasáu branu cuando tuvo llugar la grabación, nel icónicu City Hall de Hull (Inglaterra), onde interpretó cantares de los sos dos álbumes en solitariu, As You Were (2017) y Why Me? Why Not (2019), según temes mítiques d’Oasis, como Champagne Supernova, cola que cerró l’espectáculu.

El menor de los hermanos Gallagher tuvo acompañáu d’una orquesta de 24 miembros y del que fuera guitarrista d’Oasis, Paul Arthurs alies Bonehead, xuntu al que canta los clásicos Some Might Say, Stand By Me, Cast Non Shadow y Sad Song.

L’álbum, según informa Warner Music, va tar disponible en dellos formatos físicos (CD, vinilu Estándar y vinilu color) y en plataformes dixitales.

Por esti formatu pasaron mientres les últimes décades artistes internacionales de la talla de Nirvana, Aerosmith, Eric Clapton, Elton John, Mariah Carey o Alejandro Sanz, que foi’l primera cantante español que publicó’l so MTV Unplugged.

  Categories: