L’homenaxe al Texu La Collá recuerda a Rafa Balbín, Igor Medio y Carlos Redondo

by asturnet | junio 26, 2006 11:42 pm

Un añu más, y yá van tres, la Tertulia Cultural El Garrapiellu organizó l’Homenaxe al Texu La Collá (Siero). El domingu pela mañana vecinos de la parroquia de La Collá y xente venío d’otros llugares d’Asturies aconceyaron xunto al texu milenariu de La Collá pa rindir homenaxe a esti árbol, reivindicar la so proteición y homenaxear al etnógrafu Rafa Balbín Loredo, muertu fai agora un añu. Nes ruines de la ilesia vieya de San Pedru La Collá, que tien orixe prerrománicu y foi quedama nos entamos de la Guerra Civil, celebróse una misa n’asturianu a cargu del Coleutivu Manuel Fernández de Castro na que se recordó la figura de los músicos del grupu ‘Felpeyu’, Ígor Medio y Carlos Redondo, que morrieron esta fin de selmana n’accidente de tráficu.

Pola mor d’esti accidente nun pudo asistir como taba previsto, el gran maestru de gaita Diego Pangua, que tuvo que salir pal País Vascu a recoyer al so fíu accidentáu, anque yá dau d’alta. El sacerdote que dio la misa fizo una comparanza ente’l mensaxe de llucha desinteresada polos drechos de Xesucristu y la llucha pola recuperación cultural d’Asturies de los asturianistes, ‘Nun podemos mirar esta llucha pola nación asturiana dende’l puntu de vista humanu, del propiu porgüeyu, sinón dende’l puntu de vista espiritual, de la llucha desinteresada pola xusticia’. La misa cuntó finalmente col soníu de la gaita del Gaiteru de Veriña en solitariu y foi un recuerdu emocionáu de les figures de Rafa Balbín Loredo y los músicos de Felpeyu muertos el sábadu pela mañana.

N’acadando la misa, Gloria García, presidenta d’El Garrapiellu y Ánxel Nava ficieron alcordanza de la figura de Rafa Balbín embaxo’l texu y recordaron a los asistentes el so enfotu en ‘siguir facineo esti homenaxe tolos años ya implicar al pueblu de La Collá nel mesmu, homenaxeando a les persones que ficieron pola memoria d’Asturies y que cada añu mos dexen por unes o otres razones y reivindicando la recuperación d’esti espaciu natural cuasi míticu’. Dubardu Puente amenizó cola gaita los posteriores bailles alredor del texu mientres los presentes entonben los cantares habituales pa estes dances milenaries, la parte más animada d’unos actos marcaos pola tristeza d’unes muertes mui cercanes nel tiempu.

Como vien siendo habitual cada añu, El Garrapiellu aprovecha esti actu pa reivindicar pelos medios de comunicación asturianos la necesidá de protexer el Texu La Collá, árbol milenariu que nun tien proteición dalguna y que cuerre peligru de secar pola aición sobre’l tarren que tien un camín asfaltáu que pasa perbaxo d’el. Amás, les ruines de la ilesia vieya de San Pedru, asitiada a pocos metros del texu, necesiten reforzase y un caltenimientu habitual p’aguantar el pasu del tiempu ensin más desperfeutos. Conceyales del ayuntamientu de Siero asistieron n’otres ocasiones a esti homenaxe y prometieron buscar igua a esti problema, llegando a facese dalgún arreglu, pero los grandes problemes d’esti entornu siguen tando ehí. Pa tratar d’iguar esti problema organizáronse otros años esposiciones recaudatories de fondos, pero la inversión pública entovía nun llegó a esti perguapu espaciu qu’arrodia al texu de La Collá y que lleva munchos sieglos siendo’l centru espiritual d’una parroquia.

Source URL: http://asturnews.com/lhomenaxe-al-texu-la-colla-recuerda-a-rafa-balbin-igor-medio-y-carlos-redondo/

---