L’hestóricu cambiu de postura de la FSA-PSOE a favor de la oficialidá escoyida “Meyor Noticia del Añu pal asturianu”

by redacción asturnews | enero 17, 2018 3:29 pm

L’hestóricu cambiu de postura de la FSA-PSOE a favor de la oficialidá foi escoyida “Meyor Noticia del Añu pal asturianu” en 2017 na convocatoria que tolos años fai nos postreros díes del añu l’asociación Iniciativa pol asturianu.

Tres del cambiu de postura de la FSA-PSOE a favor de la oficialidá, l’arranque con ésitu’l plan pilotu pal usu del asturianu como llingua vehicular en primaria foi la segunda meyor noticia del añu y la entrada de l’asignatura de Llingua asturiana de forma regulada per primer vegada n’Educación Infantil la tercera

La votación popular llevada alantre n’internet nes primeres selmanes del añu per parte d’Iniciativa pol Asturianu dio como “Meyor Noticia del Añu pal asturianu 2017” un cambiu hestóricu na postura de la FSA-PSOE sobre la oficialidá. Dempués de décades de negativa per parte del partíu, l’impulsu de la militancia al traviés del colectivu Socialistes pola oficialidá consiguió convencer a militancia y dirixentes de sumase al consensu por esta midida, nel Congresu que se peslló l’1 d’ochobre n’Uviéu, con un sofitu del 82%. Esta noticia recibió’l 14,3% de los votos, mui cerca de la que foi la segunda meyor noticia, col 13,9%, la puesta en marcha y ésitu del plan pilotu pal usu del asturianu como llingua vehicular en primaria. Un pasu hestóricu que ta funcionando mui bien y que se punxo en marcha en seis centros de forma voluntaria pa profesoráu, centros, alumnáu y families.

En tercer llugar, y col 12% de los votos, tuvo la noticia la entrada de l’asignatura de Llingua asturiana de forma regulada per primer vegada n’Educación Infantil. Hasta agora la so presencia dependía de la voluntá y la coincidiencia de capacidá del profesoráu, ensin que tuviera un currículu regláu. Con esti dase un pasu más nel cumplimientu de la Llei d’Usu del asturianu de 1998, que garantiza’l drechu a tener l’asignatura en tolos niveles educativos.

La suma de Conceyos como Xixón, Uviéu o Avilés apoyando la oficialidá del asturianu representa yá a más del 62,79% de la población asturiana. Esta noticia qu’amuesa un ampliu consensu alredor de la oficialidá recibió’l 11% de los votos y ye la pa los internautes asturianos la cuarta meyor noticia pal idioma del añu 2017.

En quintu llugar, col 7% de los votos, la noticia escoyida foi la de los resultaos del III Estudiu Sociollingüísticu d’Asturies, fecha pol director del Euskobarómetro, y qu’ufrió dellos datos positivos sobre l’usu del idioma y el sofitu a la oficialidá, que sigue siendo mayoritaría n’Asturies. Esti trabayu dio tamién bona amuesa de la meyor percepción de los asturianos sobre la so llingua propia.

La sesta noticia considerada más positiva esti añu, col 6,4% ye l’avance na aprobación de la toponimia tradicional como oficial en nuevos conceyos, que vivió esti añu pasáu un repunte na so actividá. En séptimu llugar, col 5,8% de los votos, ta que’l Real Uviéu estrenara páxina n’asturianu y cuelgue les cróniques de los partíos n’asturianu.

Mui cerca, col 5,2% de los votos, tuvo la octava noticia del añu preferida polos internautes, el borrador de conclusiones de la comisión d’estudiu del asturianu na Xunta Xeneral fala de la necesidá d’oficialidá y que tendrá la so versión definitiva esti añu 2018.

La novena noticia, col 4,8% los votos, celebren los asturianos la entrega del primer Premiu Nacional de Lliteratura Asturiana per parte de l’Academia de la Llingua Asturiana, énte la falta de premios nacionales pa la nuesa llingua per parte del Ministeriu de Cultura, como tienen les llingües que sí son oficiales.

En décimu llugar, col 4,5% valoróse que TPA emite de forma regular partíos de fútbol comentaos n’asturianu. Yá nel puestu 11, col 3%, empaten, tuvieron que la presencia del asturianu medra na Feria Internacional de Muestres d’Asturies con espacios como’l d’Uviéu o Xixón, asina como’l d’Iniciativa pol Asturianu y delles empreses, y una noticia asocedida en Llión, la decisión de crear una cátedra alredor del llionés na Universidá de Llión, dotada con 200.000 euros pol gobiernu de Castiella y Llión.

Nos últimos llugares empataron delles noticies con ente’l 2y el 3% de votos caúna, como l’apaición de la “Cerveza pol asturianu”, como elementu reivindicativu, la puesta en marcha’l Premiu Nel Amaro de teatru profesional n’asturianu, la puesta en marcha en Grau y Candamu d’un Serviciu de Normalización Llingüística y la robla d’un conveniu en Miranda del Douru pa meyorar la presencia del mirandés nel sistema educativu.

La votación organízala dende 2013 Iniciativa pol Asturianu. En 2013 la meyor noticia foi l’ésitu de los cómics d’Astérix n’asturianu. En 2014 la noticia del añu foi la emisión del programa infantil “Los bolechas” n’asturianu, mientres qu’en 2015 foi l’anuncia d’Educación d’un proyectu pilotu pa incluyir l’asturianu como llingua vehicular n’infantil. Nel 2016 la meyor noticia foi la declaración d’oficialidá del asturianu en Bimenes, repitida 20 años dempués de la hestórica de 1998.

Source URL: http://asturnews.com/lhestoricu-cambiu-de-postura-de-la-fsa-psoe-a-favor-de-la-oficialida-escoyida-meyor-noticia-del-anu-pal-asturianu/