L’Estáu compromete 20 millones d’euros pa reconvertir el monasteriu de Corias en parador

De centru de cultivu del espíritu a complexu d’ociu y agospiu. L’Institutu de Turismu d’España, organismu dependiente de l’Alministración central, y el Principáu roblaron güei n’Uviéu un alcuerdu pol que se destinen 20 millones d’euros pa reconvertir el monasteriu de Corias en parador nacional d’equí a 2008. L’edificiu de Cangas del Narcea caltendrá la so estética herreriana ya incorporará más lluminosidá, piscines termales y campu de golf.

Nesos términos presentó esti mediudía la reforma el presidente’l Principáu, Vicente Álvarez Areces, que llegó a falar de “refundación” del vieyu edificiu monacal mercáu pola Alministración autonómica hai agora cinco años pa da-y un nuevu puxu al calor del plan pa la reactivación de les comarques mineres.

Agora, el monasteriu de Cangas renovará la so cara acordies con un proyectu del arquitectu José María Pérez Peridis ya intentará recuperar l’amplitú d’espacios y la lluminosidá perdíes na habilitación del monasteriu como centru d’enseñanza, qu’obligó a compartimentar l’edificiu.

Un campu de mini golf, una piscina termal y les correspondientes habitaciones convertirán Corias nun centru d’agospiu turísticu que l’Estáu quier emplegar pa reactivar la economía en declive de la comarca de Cangas, una de les razones que llevó a l’Alministración central a implicase nel remocicamientu’l monasteriu, d’estética herreriana y unos 23.000 metros cuadraos.