Les Xornaes d’Estudiu entamen na Facultá de Filosofía y Lletres

Esti martes, 8 de payares, a les 12:00 hores nel salón d’actos de la Facultá de Filosofía y Lletres de la Universidá d’Uviéu tuvo llugar la inauguración de les XXXV XORNAES INTERNACIONALES D’ESTUDIU cola intervención del Vicerrector d’Estensión Universitaria y Proyección Internacional de la Universidá d’Uviéu, D. José Borge
López; el Decanu de la Facultá de Filosofía y Lletres, D. José Antonio Gómez Rodríguez y la Presidenta de l’Academia de la Llingua Asturiana, Dª. Ana Mª Cano González.

Les Xornaes celebraránse los díes 8, 9 y 10 de payares de 2016 y nelles participarán un bon númberu de profesores ya investigadores asturianos xunto con otros de distintes universidaes españoles y estranxeres.

La sesión entamó coles presentaciones de la edición dixital del númberu 115 de la revista Lletres Asturianes y del númberu 6 de la revista Ciencies. Cartafueyos Asturianos de Ciencia y Teunoloxía. La conferencia inaugural tuvo al cargu del profesor Aurelio González Ovies (de la Universidá d’Uviéu) que faló sobre «”Aquella caxa llonxana”, un tópicu al que s’acerca la mayoría los poetes».

Pela tarde, les Xornaes abrieron cola conferencia del profesor Ramón Mariño Paz (Universidá de Santiago de Compostela) sobre «El cultivo escrito del gallego y del asturiano entre el ocaso medieval y el renacimiento contemporáneo», seguida de les comunicaciones de l’Académica Marta Mori d’Arriba y de les d’Esther Prieto Alonso, Inaciu Galán y González y Emilio Frechilla Díaz. L’actu pesllose coles ponencies «La aparición de la novela criminal en asturiano y su relación con las literaturas de la Península Ibérica» de Javier Rivero Grandoso, y «La mitoloxía clásica nos anicios de la Lliteratura Asturiana» a cargu del profesor de la Universidá d’Extremadura, Ramiro González Delgado.