Les Xornaes de l’ALLA van celebrase del 9 al 11 de Payares

Les Xornaes de l’ALLA van celebrase del 9 al 11 de Payares
29 ochobre 17:21 2021 Imprimir

Les Xornaes Internacionales d’Estudiu de l’Academia de la Llingua Asturiana vuelven llueu del parón pandémicu na Facultá de Filosofía y Lletres de la Universidá d’Uviéu que va acoyer tres díes d’actividaes académiques, ponencies, comunicaciones y presentaciones dende’l 9 al 11 de payares. La inscripción pa participar ya tá abierta dende la selmana pasada.

El programa d’estes XXXIX Xornaes Internacionales d’Estudiu de l’Academia de la Llingua Asturiana van abrise nel tarrén sociollingüístico, col académicu y caderalgu de la Universidá del País Vascu, Francisco Llera Ramo, que va presentar el III Estudiu del Navia-Eo y Reglindis de Ridder, profesora de la Universidá d’Estocolmu, que va falar de la importancia sociollingüística de la traducción audiovisual.

Dientro d’otros enfoques de la traducción tamién van poner ponencies los profesores Vicent Escartí (de la Universidá de Valencia) y Cláudia Martins (de la Universidá d’Aveiro). La nómina de ponentes inxer tamién a Simona Georgescu (Universidá de Bucarest), que va falar de les aportaciones del asturianu a la etimoloxía románica, y a Aurelio González Ovies (Universidá d’Uviéu), que participa con una conferencia sobre’l retornu a la infancia na poesía d’Asturies. Otres ocho comunicaciones curties, dos presentaciones y un diálogu sobre l’asturianada ente Carlos Rubiera y Héctor Braga, completen el programa d’estes XXXIX Xornaes Internacionales d’Estudiu dirixíes por Ana María Cano González y Carmen Muñiz Cachón, de la Universidá d’Uviéu.

Loading Facebook Comments ...