Les Xornaes de l’ALLA acoyeron la presentación del nuevu Lletres Asturianes

07 11:23 2018 Imprimir

Esti martes, 6 de payares, a les 12 hores na Facultá de Filosofía y Lletres de la Universidá d’Uviéu entamaron les XXXVII Xornaes Internacionales d’Estudiu cola intervención del Vicerrector d’Investigación de la Universidá d’Uviéu, D. José Ramón Obeso Suárez; el Decanu de la Facultá de Filosofía y Lletres, D. José Antonio Gómez Rodríguez y el Presidente de l’Academia de la Llingua Asturiana, D. Xosé Antón González Riaño.

Les Xornaes celébrense los díes 6, 7 y 8 de payares y nelles participen un bon númberu de profesores ya investigadores asturianos xunto con otros de distintes universidaes españoles y estranxeres. La primer sesión entamo coles presentaciones de la edición dixital del númberu 119 de la revista Lletres Asturianes y del númberu 8 de la revista Ciencies. Cartafueyos Asturianos de Ciencia y Teunoloxía. La conferencia inaugural tuvo al cargu del profesor Xosé Antón González Riaño (ALLA & Universidá d’Uviéu) que que falará sobre «La llingua asturiana nuna perspeutiva d’oficialidá».

Pela tarde, les Xornaes abriéronse coles comunicaciones de Aurelio González Ovies, Llucía Menéndez Menéndez, Severino Antuña González, Alejandro Junquera Martínez y María Moro Piñeiro. L’actu del día pesllose cola ponencia «Hispanoamérica, un puzle iberorrománico: la huella asturleonesa en la conformación histórica del español americano» del profesor de la Universidá suiza de Neuchâtel, Juan Pedro Sánchez Méndez.

Les xornaes continúen esti miércoles 7, nel salón d’actos del edificiu alministrativu (1a planta) de la Facultá de Filosofía y Lletres de la Universidá d’Uviéu, onde va celebrase la segunda sesión d’estes XXXVII Xornaes Internacionales d’Estudiu entamaes pola Academia.

Les sesiones entamarán a les 16:30 hores cola ponencia del profesor Paolo Roseano, de la Universidá de Barcelona, titulada «Análisis dialectométrico de la prosodia del asturiano en el ámbito románico: una primera aproximación». Darréu, la sesión continuará coles comunicaciones de Carmen Muñiz Cachón (Universidá d’Uviéu y ALLA), Alberto Gómez Bautista, Rosabel San Segundo Cachero y Víctor Suárez Piñero.

La xornada pesllaráse cola ponencia «El asturiano y las áreas geoprosódicas del occidente ibérico», de la profesora Elisa Fernández Rey de la Universidá de Santiago.

  Categories:
Loading Facebook Comments ...