Les ventanes de les aules van tar abiertes ente 10 y 30 centímetros

L’Asociación Española de Pediatría y la Confederación española d’asociaciones de families, la Ceapa, ellaboraron un documentu conxuntu nel que pruyen a caltener la ventilación constante de les aules, pa lo que bastaría, dicen, tener les ventanes parcialmente abiertes, ente 10 y 30 centímetros. D’esa forma, nel 95% de les ocasiones consíguese que los niveles de CO2 tean per debaxo de 700 ppm, que ye la llende fayadiza.

Pa comprobalo de forma permanente, los sanitarios encamienten instalar mididores de CO2 nes aules, daqué que lo que se van sumando yá numberosos colexos. La ventilación natural contribúi non solo a menguar les infecciones de coronavirus, sinón tamién de gripe y d’otros virus respiratorios. L’Asociación Española de Pediatría y la Ceapa encamienten tamién, como fixeron les autoridaes sanitaries dende’l principiu, aprovechar no posible los espacios al campu pa les actividaes lectives.

N’Asturies, les conseyeríes de Salú y Educación empezaron esta última selmana una serie de xuntes coles direcciones de los centros asturianos. La intención ye resolver les munches duldes que van surdiendo sobro los protocolos rellacionaos cola covid, en continua revisión, tamién les referentes a la ventilación. El Principáu asegura que quier caltener les xuntes a lo llargo del cursu.

Los alcuentros tamién van llegar a les AMPAS, pa informar sobro la normativa actualizada de la covid y tamién sobro la ventilación de les aules. Son munchos los centros que yá s’interesaron polos mididores de CO2 y los purificadores d’aire. Nesti sentíu, la conseyería aconseya «ventilar con frecuencia les instalaciones del centru, siquier mientres 10-15 minutos al entamu y a la fin de la xornada, mientres el recréu, y siempres que sía posible ente clases, calteniéndose les ventanes abiertes tol tiempu que sía posible». Tamién da directrices sobro los sistemes de purificación d’aire.