Portada Educación Les universidaes ufierten les sos residencies pa refuxaos

Les universidaes ufierten les sos residencies pa refuxaos

by asturnet

La busca de soluciones a la crisis de los refuxaos sirios llegó tamién a les universidaes españoles. La Conferencia de Rectores de les Universidaes Españoles (CRUE) aprobó una declaración oficial na qu’animen a los campus a facilitar l’accesu a alumnos y docentes universitarios refuxaos.

Los rectores proponen acoyer a los refuxaos universitarios nes sos residencies, apurrir servicios d’asesoramientu llegal, psicolóxicu o sanitariu, ente otros, promover acciones de voluntariáu o dar soluciones a los problemes d’accesu a les universidaes, amás de facilitar beques “nos casos nos qu’ello fuera posible”. Nun alcuerdu del comité de internacionalización y cooperación de la CRUE, robláu esti xueves, señalen tamién que los campus van poder asitiar los países en conflictu como prioritarios en materia de cooperación.

Universidaes como Salamanca o Zaragoza preven ufiertar cames nes sos residencies pa estudiantes refuxaos. Otres, como la Universidá de Valencia, quieren dar asesoría llegal a los migrantes. La Complutense, la universidá presencial más grande d’España, pretende ufiertar ayuda psicolóxica y académica. Los alumnos orixinarios de Siria van poder allegar a clase como oyentes y van intentar atopar la fórmula pa que sigan los sos estudios nos sos campus.

Pel momento, abrieron l’alderique y falta concretar midíes, anque dende la CRUE destaquen que ye la primer vegada que faen un pronunciamientu d’esti tipu qu’implique al conxuntu d’universidaes públiques y privaes españoles.

La CRUE presentó esti miércoles la so primer Guía de Bones práctiques en Materia de Cooperación al Desenvolvimientu, qu’analiza 41 esperiencies de 28 universidaes. Les universidaes, según esti informe, destinaron 10,3 millones a la cooperación en 2014. Caltuvieron la so ayuda nos años de crisis, con una xubida del presupuestu d’un 4% ente 2013 y 2014.

Los esfuerzos destináronse principalmente a acciones n’América Llatina (33%), África (17,9%) y a acciones tresversales en distintos países en víes de desenvolvimientu (41,2%).

Tamién te podria gustar