Portada Educación Les universidaes públiques pierden 77.000 places en 4 años

Les universidaes públiques pierden 77.000 places en 4 años

by redacción asturnews

El cursu pasáu matricularanse nes universidaes públiques españoles 1.294.191 estudiantes de grau y másteres oficiales, o lo que ye lo mesmo, perdiéronse en 4 años 77.000 places.

Esti pasáu foi l’añu con menos estudiantes del últimu llustru, siendo la medría de les tases o l’endurecimientu de los requisitos pa llograr beques dalgunes de les razones que remana la federación d’enseñanza de Comisiones Obreres (CCOO), qu’acaba de faer públicu’l so informe d’entamu de cursu nes universidaes, con datos del Ministeriu d’Educación, entá provisionales.

El descensu d’alumnos supon “un atentáu contra la igualdá d’oportunidaes”, según el responsable d’Educación de CCOO, Francisco García, que lo considera amás “un espilfarru de capital humanu”. La cayida produzse principalmente nos alumnos de grau y en menor midida nos  de máster.

El Ministeriu d’Educación, pela so parte, señaló qu’esti amenorgamientu debese a la fase d’adaptación a Bolonia. Hasta 2010, les carreres duraben cinco años y, cola adaptación al Espaciu Européu d’Educación Superior (EEES), amenorgara a cuatro. Poro, la tasa neta d’escolarización universitaria nos mozos ente 18 y 24 años ye la más alta de la hestoria, asitiándose nel 29´7% frente al 27’9%” del cursu 2011-2012, según el ministeriu.

Comisiones denuncia nel so informe que “de forma paralela” les universidaes privaes y la Ilesia ganaron terrén al respective de les públiques nos másteres, con un 54% más d’alumnáu nesti ciclu dende 2012 hasta 42.000 alumnos.

El presupuestu de les universidaes públiques aumentó casi 140 millones d’euros nel últimu cursu hasta 8.735 millones. Sicasí, ye la segunda cifra más baxa de los últimos cinco años.

Tamién te podria gustar