Les tradiciones navidiegues asturianes afítense n’Avilés cola V Folixa de Navidá

by redacción asturnews | diciembre 13, 2019 11:42 am

L’Anguleru, los Llendadores de la Ría, el Nataliegu y les tradiciones navidiegues asturianes afítense n’Avilés cola V Folixa de Navidá que vuelve pal Auditoriu de la Casa la Cultura esti vienres 13 d’avientu, a les 19:00 hores, con entrada llibre y de baldre hasta completar aforu.

Alumnáu del colexu Sabugo va lleer poemes navidiegos, el del Marcelo Gago fadra la Ufrienda’l Nataliegu xunto al grupu de teatru Santa Bárbara, y el corín de La Carriona-Miranda va cantar a L’Anguleru col coru de Xuntanza. Olga Cuervo, presentará la folixa, y xunto con David Varela pondrán música y voz al cuentu “Un osu perfadiosu”, la última obra de Vitu Pintado y Alberto Álvarez Peña. Nomaráse a María González González, “La maizona”, “Mestra Llendadora 2019″ a títulu póstumu. El Nataliegu, el troncu de Navidá, que fizo l’alumnáu de la Escuela Municipal de Cerámica, presidirá la folixa.

N’Avilés tán bien afitaes les tradiciones navidiegues asturianes, poles que puxa siempre’l Conceyu d’Avilés, per aciu de la Estaya de la Llingua, llegando asina hasta la Folixa de Navidá, de la que se cumple esti añu la so quinta edición. La cultura marinera d’Avilés y la Navidá asturiana xúntense asina. L’Anguleru, los Llendadores de la Ría, el Nataliegu y el ramu de Navidá, vuelven pal Auditoriu de la Casa la Cultura esti vienres 13 d’avientu, a les 19:00 hores, con entrada llibre y de baldre hasta completar aforu (nun se va poder entrar n’entamando l’espectáculu y tampoco con carricoches nin silles infantiles).

Collaboren na so puesta en marcha l’Asociación Garabuxada, los colexos públicos Sabugo, La Carriona-Miranda y Marcelo Gago, y esti añu xúntase la primer vez la Federación d’Asociaciones Xuntanza y el grupu de teatru Santa Bárbara de Llaranes.

L’espectáculu, preparáu con munchu ciñu, y con Olga Cuervo un añu más como maestra de ceremonies, va entamar cola “Danza del tuerín de Navidá”, interpretada por Xuntanza. Tres del baille, poemes de Navidá, na voz de les neñes y neños del colexu Sabugo. La mesma Olga Cuervo y el músicu David Varela va dar vida al llibru  “Un osu perfadiosu”, la última obra del maestru y escritor Víctor Pintado Rey “Vitu” -con ilustraciones d’Alberto Álvarez Peña-, que recupera la tradición de los aguilandos, tamién llamaos mazcaraes d’iviernu. La participación de los Sidros de Valdesoto de l’Asociación El Cencerru, dara-y más espectacularidá y color.

De la Ufrienda’l Nataliegu va encargase l’alumnáu del colexu Marcelo Gago, al que va engabitar el grupu de teatru Santa Bárbara de Llaranes, con una pieza teatral pequeña na que l’apaición de los llexendarios trasgos encantexará al auditoriu.

Esti añu fadráse un homenaxe a un nuevu nataliegu, creáu pa esta ocasión por alumnáu de la Escuela Municipal de Cerámica. Van ufri-y “Bollinos del Nataliegu”, donaos pola Confitería Vidal, fechos siguiendo les referencies etnográfiques de Xuan Xosé Fernández-Piloñeta, que recueye’l vezu asturianu de facer bollos dulces pa neñes y neños per Nuechebona.

Más información[1]

 

Endnotes:
  1. Más información: http://aviles.es/web/guest/inicio/-/asset_publisher/iuRYQKs29WiC/content/l-anguleru-los-llendadores-de-la-ria-el-nataliegu-y-les-tradiciones-navidiegues-asturianes-afitense-n-aviles-cola-v-folixa-de-navida/12309

Source URL: http://asturnews.com/les-tradiciones-navidiegues-asturianes-afitense-naviles-cola-v-folixa-de-navida/