Portada Sociedá Les solicitúes de conceyos pa subvenciones al usu del asturianu medren un 50 por cientu

Les solicitúes de conceyos pa subvenciones al usu del asturianu medren un 50 por cientu

by asturnet

Los conceyos apúntense cada vegada más al carru de les subvenciones a la promoción llocal del asturianu. La conseyería de Cultura, Comunicación Social y Turismu almacena un total de 151 peticiones d’ayuntamientos pa recibir partíes económiques que-yos permitan normalizar la llingua asturiana nel ámbitu municipal, frente a les 108 tramitaes na pasada campaña de 2003.

El Principáu ultima la resolución de la convocatoria de subvenciones a la promoción del asturianu en toles estayes pal exerciciu de 2004, con un primer elementu destacáu respecto al añu pasáu: Con calter xeneral, recibiéronse más peticiones en cada una de les convocatories específiques, empobinaes a subvencionar l’usu y presencia del asturianu na lliteratura, nos medios de comunicación, na música, nes empreses y nos llibros de testu, ente otros ámbitos.

La Oficina de Política Llingüística, que dirixe Ramón D’Andrés, yá introduxo matices na convocatoria pública d’esti añu pa delimitar d’un mou más precisu quién pue ser beneficiariu de les ayudes económiques y pa qué han valir eses subvenciones, una intención que pasará a mayores na prósima convocatoria de 2005 si prospera l’interés de la Oficina por “acotar tovía meyor l’oxetivu de les subvenciones”.

L’espoxigue nel númberu de solicitúes presentaes polos conceyos, qu’en términos porcentuales ye del 50 por cientu sobro l’añu pasáu, respuende, según D’Andrés, a la especial vitalidá que tán amosando los conceyos pa normalizar la llingua asturiana nos sos respectivos territorios. Un interés que tien reflexu nos trabayos de la Xunta de Toponimia, qu’hasta la fecha namás recibió peticiones cursaes dende los municipios pa recuperar los nomes tradicionales de llugar.

Tamién te podria gustar