Portada Conceyos Les sestes Xornaes Cervantines traen a Avilés la esposición “Cervantes na cinta del tiempu”

Les sestes Xornaes Cervantines traen a Avilés la esposición “Cervantes na cinta del tiempu”

by redacción asturnews

Les sestes Xornaes Cervantines van traee a Avilés la esposición “Cervantes na cinta del tiempu” que va permanecer n’exhibición hasta’l 9 d’avientu nel Palaciu de Valdecarzana. Un percorríu por 150 años d’hestoria de la fotografía centrada na figura universal de Don Quixote de La Mancha y na so representación n’artes como’l cine o’l teatru. L’amuesa ta producida pol Muséu Casa Natal de Cervantes, na Comunidá de Madrid.

Tratase d’una amuesa entamada pol Muséu Casa Natal de Cervantes-Comunidá de Madrid, comisariada por Lucía Laín, que supon un percorríu por más d’un sieglu y mediu d’hestoria de la fotografía en redol a la universal figura del Quixote.

Xira en trés ámbitos distintos: homenaxes y llugares cervantinos, les artes escéniques y el mundu del cine, vistu dende los oxetivos de fotógrafos como Laurent, Martínez Sánchez, Kaulak, Alonso o Wunderlich, pasando polos maestros del fotoperiodismu del primer terciu de sieglu, la posguerra y la transición, como fueron Cortés, Alfonso, Campúa, Santos Yubero y Portiellu, enllazando con trabayos más recién en formatu cinematográficu o teatral, tollo en redol al Quixote.

El títulu de la esposición esprendese d’una cita de Manuel Azaña: “…si cortamos la cinta del tiempu’ atopamos colo actual, l’agora mesmu”, y rellaciónase con un espaciu temporal que toma cientu cincuenta años de la hestoria de la fotografía, con El Quixote y el so mundu como protagonistes.

Toma como puntu de partida la primer composición fotográfica sobro El Quixote realizada en 1857 pol fotógrafu británicu William Lake Price, y cierra coles fotografíes del últimu estrenu cinematográficu de Terry Gilliam “L’home que mató a Don Quixote”, xenerando un discursu nel que pasáu y presente xúnense como si cortárase un cachu de la cinta del tiempu”.

La esposición podrá visitase de forma gratuita nel Palaciu de Valdecarzana, de llunes a vienres, n’horariu de 18.00 a 21.00 hores.

Tamién te podria gustar