Les puertes y ventanes de la clas tienen de tar abiertes «tolo posible»

Les puertes y ventanes de la clas tienen de tar abiertes «tolo posible»
13 xineru 11:41 2021 Imprimir

La Conseyería vieno acabante espublizr orientaciones clares palos centros educativos, afitando que Les puertes y ventanes de la clas tienen de tar abiertes «tolo posible». L’encamientu oficial d’Educación ye ventilar siquier 15 minutos al entamu y fin de la xornada, 5 minutos ente clases y en tolos descansos, o caltener les ventanes enteabiertes si nun se puen abrir dafechu por ser anti-suicidiu.

Hasta agora, cada centru, inclusive cada profesor, faía lo que consideraba meyor: dende abrir unos centímetros les ventanes de forma permanente hasta abrir solo ente clases. Agora, toos tienen a qué atenese. Porque Educación publicó’l documentu ‘Encamientos preventivos de ventilación en centros educativos’, ellaboráu pola Conseyería d’Alministración Autonómica, Mediu Ambiente y Cambéu Climáticu. El documentu señala la necesidá de ventilar les clases, meyor si ye con ventilación cruciada. Esto ye, puertes y ventanes abiertes. Nun hai otra fórmula, magar que les temperatures nel esterior sían baxes, como estos díes. Ye más, el primer encamientu sigue siendo que «si les condiciones meteorolóxiques lo dexen, les actividaes n’esterior son siempres preferibles al interior». Si eso nun ye posible, «ye preferible aules con posibilidá de ventilación natural, especialmente ventilación cruciada (ventanes y puertes en llaos opuestos)». La tercer opción, «si la ventilación natural nun ye abonda, xeneralmente puede consiguise ventilación abonda utilizando equipos estractores o impulsores con un caudal d’aire fayadizo (ventilación forzada)». Hai qu’esperar a la cuarta opción p’atopase con daqué distintu: «Cuando tolo anterior nun ye posible o nun ye abondu, débese purificar l’aire con equipos provistos de filtros HEPA H13 o cimeru».

Los encamientos del Principáu marquen unos mínimos: «Ye recomendable ventilar siquier 15 minutos de primeres y la final de la xornada (mañana o tarde), 5 minutos ente clases y mientres tolos descansos, abriendo les ventanes y puertes mientres el tiempu que s’envalore necesariu según les característiques de cada espaciu», esto ye, tamañu de l’aula y el númberu d’alumnos.

El documentu diz textualmente: «les puertes de les aules tienen de permanecer abiertes tanto como sía posible, según les ventanes y puertes de los pasiellos pa facilitar la renovación constante d’aire nes aules». Tamién fala de los casos escepcionales nos qu’haya qu’aplicar ventilación individual forzada, la purificación del aire y les característiques deseables de los purificadores, lo mesmo que de los valores de CO2 y los mididores. Y fai una alvertencia: «la evidencia científica sobro la efectividá de cada midida ta llindada».

  Categories: