Les películes van tener de ser inclusives y con diversidá racial o xéneru pal Oscar

by redacción asturnews | septiembre 16, 2020 8:38 am

Los movimientos Me Too y Black Lives Matter arriendes de los abusos de Harvey Weinstein y del homicidiu policial de George Floyd, respectivamente, emburriaron a Hollywood a imponer severes esixencies de diversidá racial, de xéneru y en favor de toles minoríes como requisitu imprescindible para competir pol Oscar a meyor película.

Les nueves normes, anunciaes va trés meses y agora confirmaes y concretaes pol acabante escoyer presidente de l’Academia de Cine d’Estaos Xuníos, David Rubin, empezaron a crear discutiniu.

Les midíes, coles que Hollywood camuda’l chip dempués de socesivos discutinios pola so falta de sensibilidá en materia racial y de xéneru, nun se van aplicar de manera estricta hasta los premios del 2024 pero van contemplase yá dende’l 2022. La normativa nun se va considerar con vistes a la próxima gala cuidando que la mayoría de les películes que puedan entrar en tema yá se rodaron y en dellos casos proyectaron.

Ente los nuevos requisitos, de los que les candidates al Oscar absolutu han cumplir siquier dos d’ente cuatro tipos de criteriu, destaca la obligación de que siquier unu  los protagonistes o’l 30% de la repartida secundaria represente a una minoría. Y el equipu técnicu tamién tien d’afaese a la riegla. Los cuatro estándares ente los que tienen de cumplise siquier dos son los de “representación en pantalla, en temes y narrativa”; “representación na dirección creativa y l’equipu del proyectu”, “accesu y oportunidaes na industria audiovisual, y “desenvolvimientu de les audiencies”.

Source URL: http://asturnews.com/les-pelicules-van-tener-de-ser-inclusives-y-con-diversida-racial-o-xeneru-pal-oscar/