Les palabres de Miguel Alarcos pa cola llingua asturiana, “puta mentira de políticos y filólogos paletos”, prenden na rede

by redacción asturnews | octubre 29, 2015 12:49 pm

Una petición en change.org de la escritora Raquel F. Menéndez “contra l’escarniu al asturianu dende la Universidá d’Uviéu” axunta 1200 firmes nun día.

Raquel F. Menéndez diz faer la petición de firmes pa llograr que l’Ayuntamientu quite les subvenciones a la Cátedra Alarcos tres de les declaraciones insultantes del fíu d’Emilio Alarcos, profesor Ayudante de la Universidá d’Uviéu, por “sentimientu personal, pero pensando nes voces de tolos poetes y de tolos falantes de la llingua asturiana que dalguna vez sintiéronse censuraos por usar la so llingua”.

Les palabres de Miguel Alarcos tuvieron continuación nel grupu de Facebook qu’alministra embaxo’l nome de “Pervivencia y actualidad” onde diz que “todo fue muy bonito, salvo por una cosa que afea el libro… La presencia de poesía en llingua asturiana, constructo artificial que nadie habla y que tanto denostó Emilio Alarcos, lo que le costó insultos y sinsabores”.

Pero lo más grave ye que delles llínees depués entá desvaría más: “queda terminantemente prohibido cualquier uso o difusión del acto o de cualquier otro en que el nombre de Alarcos Llorach se vea mezclado con las actividades de ese invento del asturiano… una puta mentira que se aprovecha de la gente de bien y beneficia a políticos y filólogos paletos”. Ya inclusu fai una alvertencia: “queda también prohibido la defensa o uso de la llingua asturiana en este grupo. Antes era tolerante. Ahora se me han hinchado las pelotas y ya no paso ni una”. Poco más ha decise. Ya lo califica’l propiu Miguel Alarcos sin que faiga falta añadir denguna cosa más.

 

 

Como describe Raquel f. Menéndez na petición de Change.org, esti 26 d’ochobre, tuvo llugar nel Edificiu Históricu de la Universidá la presentación de l’antoloxía “Homenaje a los poetas de la Cátedra Emilio Alarcos”, editada pola Cátedra Emilio Alarcos de la Universidá d’Uviéu. Pa la mesma, a la vez que se-y encargó al poeta Lorenzo Oliván una conferencia sobre universidá y poesía, lleeron dalgunos de los poetes incluyíos dos poemes caún.

Raquel foi la primera en lleer: “En primer llugar, recité un poema n’español na memoria d’Amparo Pedregal, feminista y profesora d’hestoria antigua de la Universidá. Depués, decantéme por un poema n’asturianu. Non por ánimu provocador, sinón, simplemente, porque nel últimu añu nun escribí casi en nada más que nun fuera na nuesa llingua. Dende la mesma mesa oí un murmuru, pero intenté nun da-y muncha importancia”.

El rechazu irracional al asturianu de la familia d’Emio Alarcos notose tres dela llectura como narra Raquel F. Menéndez: “Cuando volví al mio sitiu dixéronme que les cares de la directora de la Catedra Emilio Alarcos fueron de rechazu cuando yo dixi que diba lleer n’asturianu. Sinceramente, nun me lo tomé en serio. Insisto: nun foi nengún actu de rebeldía, sinón de lleer lo que nesi momentu m’apetecía. Nun sabía que la posición de la Cátedra Emilio Alarcos fuera de total negación de la realidá llingüística d’Asturies. Amás, Claudia Elena Menéndez y Lluis Xabel Álvarez lleeran nel alcuentru orixe d’esta antoloxía n’avientu de 2013 los sos poemes n’asturianu, y asina fueron recoyíos na mesma. Llamentablemente, nengún dellos taben presentes ayeri”.

Las llectures finaron con Miguel Alarcos, profesor de la Universidá d’Uvieu, poeta, y fíu de Emilio Alarcos y de Josefina Martínez, directora de la Cátedra.  Agradeció lo primero’l tar n’antoloxía pero como destaca Raquel F. Menéndez, “reconoció depués que consideraba una falta de respetu a la memoria del so padre que nella s’incluyeren poemes en llingua asturiana. Nesi momentu tol mundu entendió l’acusación como una respuesta a la llectura del mio poema, pero, más qu’a eso (que tamién) referíase a los poemes n’asturianu que figuren n’antoloxía, firmaos por xente como Claudia Elena Menéndez (que dende la so mocedá ta lluchando muncho pola llingua) y Lluis Xabel Álvarez (que lleva una vida faciéndolo)”.

Al final del actu, Roberto Sánchez Ramos, conceyal de Cultura por IU, mostró-y a Raquel so apoyu en priváu, como fixeron más ellí presentes.

La petición de la retirada de subvenciones tien una desplicación mui clara: “Paezme vergonzoso que, partiendo d’estes idees sobre la diversidá llingüística, la Cátedra Emilio Alarcos reciba subvenciones del Ayuntamientu d’Uvieu, y que la propia Universidá d’Uvieu nun condene’l mensaxe d’un profesor qu’atenta contra la conciencia llingüística de munchos falantes del Principáu. Con esta recoyida de firmes  lo únicu que se quier ye dexar constancia de que negámonos a que siga censurándose la llingua asturiana dende los órganos de poder y dende la Universidá d’Uviéu”. 

Source URL: http://asturnews.com/les-palabres-de-miguel-alarcos-pa-cola-llingua-asturiana-puta-mentira-de-politicos-y-filologos-paletos-prenden-na-rede/